© Sputnik / Pavel Lvov
Sel basqan aimaqtarda 69 eldi mekenge áli de kólik qatynai almaidy. Bul týraly respýblikalyq aqparattyq shtabta ótken brifingte QR TJM azamattyq qorǵanys jáne áskeri bólimder komitetiniń aǵa ofitseri Erasyl Saipash aitty, dep habarlaidy «Ult aqparat» Sputnik Qazaqstanǵa silteme jasap.
Sý tasqyny bastalǵaly beri 96 myńnan astam adam qutqaryldy, onyń 31 myńnan astamy bala.
Saipashtyń aitýynsha, 2 823 adam ushaqpen qutqarylǵan, onyń 865-i bala.
"Ýaqytsha pýnktterge 7 605 adam, onyń ishinde 3 474 bala ornalastyryldy. 82 559 mal qaýipsizdik jerge shyǵaryldy. Zardap shekken óńirlerge 167 935 kg gýmanitarlyq kómek jetkizildi. 8,5 mln astam tekshe metr erigen qar sýy soryldy. 2 750 turǵyn úi men 1 816 aýla aýmaǵynan sý buryldy", - deidi Erasyl Saipash.
Táýlik boiy avariialyq-qutqarý jumystaryna 24 295 adam, 2 655 birlik tehnika, 469 sý sorý tehnikasy jáne 139 júzý quraly, 10 áýe kemesi jumyldyryldy.
"10 sáýir tańerteńgi saǵat 10:00-degi jaǵdai boiynsha Atyraý, Aqtóbe, Aqmola, Qostanai, Soltústik Qazaqstan oblystarynda 3 444 jeke turǵyn úi, 339 aýla aýmaǵy sý astynda qalǵan. Sý shaiǵan 105 avtojol, onyń ishinde 8 kópir men 97 jol tósemi baqylaýda tur. 69 eldi meken kólik qatynasynsyz qalǵan", – dedi spiker.
Respýblikalyq jáne jedel shtabtar jumys istep jatyr. TJM azamattardy sý tasqyny kezinde muqiiat bolýǵa jáne qaýipsizdik sharalaryn qatań saqtaýǵa shaqyrady.
