Qazaqstanda sekseýil kesýge tyiym salý merzimi taǵy 5 jylǵa uzartyldy, dep habarlaidy "Ult aqparat" «Habar 24» telearnasyna silteme jasap.
Buǵan deiin mundai shekteý elimizdiń orman sharýashylyǵy jáne janýarlar dúniesi komitetiniń buiryǵy negizinde 2015 jyldan 2018 jyldyń 31 jeltoqsanyna deiin engizilgen bolatyn.
Atap ótilgendei, tabiǵatty qorǵaýǵa baǵyttalǵan osyndai sharalar negizinde Qazaqstanda sekseýil plantatsiialarynyń kólemin arttyrý múmkin boldy.
Búginde Syr óńirindegi ormandy jerlerdiń 87 paiyzynda shólge shydamdy aǵashtyń osy túri ósedi. Aita keteiik, «Ormandardy saqtaý jáne respýblikanyń ormandy jerlerin kóbeitý» jobasy aiasynda 2008-2014 jyldar aralyǵynda Aral teńiziniń qurǵaǵan ultanyna 57 myń gektardan astam sekseýil, sarsazan tárizdi, shólge, sortań topyraqqa beiimdi aǵash-buta túrleri otyrǵyzyldy. Biyl taǵy 10 myń gektar teńiz ultanyna sekseýil egilmek.
«2018 jyly osy kúnge deiin sekseýil plantatsiialaryn zańsyz kesýdiń 49 deregi tirkeldi. 10 azamatqa aiyppuldar salyndy, úsh adam 200 saǵattyq qoǵamdyq jumysqa tartyldy. Taǵy eki adam bir jylǵa deiin bas bostandyǵynan aiyryldy. 25 sottalýshy tabiǵatqa keltirgen shyǵyndy ótegennen keiin sot sheshimimen qylmystyq jaýapkershilikten bosatyldy», - dedi oblystyq Orman sharýashylyǵy jáne janýarlar dúniesi aýmaqtyq inspektsiiasynyń bas mamany Aibek Jolaqanov.
