Qasym-Jomart Toqaev óz prezidenttiginiń eki jylynda eldegi áleýmettik-ekonomikalyq, qoǵamdyq-saiasi máselelerdi sheshýde evoliýtsiialyq-progressivti sheshimderdiń qabyldanýyna yqpal etti.
Bul pikirdi saiasattanýshy, Ulttyq qoǵamdyq senim keńesiniń múshesi Erlan Saiyrov aitty, dep habarlaidy QazAqparat.
«Qasym-Jomart Toqaevtyń búkilhalyqtyq sailaýda jeńip shyqqanyna eki jyl boldy. Osy eki jylda elimizde eń birinshi qoǵamdyq-saiasi salada evoliýtsiialyq turǵyda reformalar bolyp jatyr. Ózderińiz bilesizder, eń aldymen Ulttyq keńes quryldy. Osy Ulttyq keńes aiasynda bizdiń elimizdegi saiasi reformalardy júzege asyrýdyń paketteri usynyldy. Birinshi paket boiynsha miting týraly jańa turpattaǵy zań qabyldandy, sonymen birge «parlamenttik oppozitsiia» uǵymy paida boldy. Partiia týraly zańǵa ózgerister engizip, jastar men áielderge 30 paiyzdyq kvota engizildi. Ekinshi paket boiynsha, biyldan bastap aimaqtarda, aýdandyq deńgeidegi aýyl, poselok, qalalardyń ákimderi sailanatyn bolady. Biyl 830 ákim sailanady, bul elimizdegi saiasi reformalardyń aimaqtarǵa kóshkendiginiń belgisi», - dedi Saiyrov.
Sonymen birge, saiasattanýshy halyqtyń áleýmettik jaǵdaiyn túzeýge arnalǵan birqatar sheshim týraly aitty.
«Eń aldymen kredittik amnistiia jasaldy, muǵalimder men dárigerlerdiń jalaqysy ósti, sosyn aýyldarda mal urlaýǵa qatysty zań kúsheitildi. Bul da halyqtyń áleýmettik jaǵdaiyn retteýge baǵyttalǵan qadam. Ekonomikaǵa oiyssaq, kvazimemlekettik sektordyń satyp alýlaryn baqylaý, baqylaǵanda qazaqstandyq óndirýshilerge basa nazar aýdarý máselesine arnalǵan zańǵa jaqynda Prezident qol qoidy. Osy qadamdardyń barlyǵy elimizdegi áleýmettik-ekonomikalyq, qoǵamdyq-saiasi máselelerdi sheshýde evoliýtsiialyq-progressivti sheshimderdiń qabyldanyp jatqanynyń kórsetkishi, ol sheshimderdiń eń basynda QR Prezidenti Qasym-Jomart Kemeluly Toqaev tur», - deidi Erlan Saiyrov.
Eske sala ketsek, 2019 jyly Nur-Sultan ýaqytymen 20.00-de Qazaqstanda kezekten tys Prezident sailaýyna daýys berý aiaqtaldy. Sailaýshylardyń 77,5% daýys berýge qatysty. «Nur Otan» partiiasynyń atynan QR Prezidenti kandidattyǵyna túsken Qasym-Jomart Toqaevqa sailaýshylardyń 70,96%-y daýys bergen.
