Túrkistan oblysy, Sairam aýdanynda saýnaǵa kelgen jigitterdi aiaýsyz soqqyǵa jyqqan kúzet qyzmetkerleri sottaldy. Segiz ai buryn bolǵan qylmysty oqiǵa kezinde 27 jastaǵy azamat esin jimastan kóz jumǵan edi, dep habarlaidy QazAqparat.
Sairam aýdandyq sotynyń málimetinshe, atalǵan qylmystyq oqiǵa boiynsha 5 aiyptalýshyǵa qatysty úkim shyqty. Sottalýshylardyń biri – 9 jyl, endi bireýi - 8 jylǵa bas bostandyǵynan aiyryldy. Taǵy 3 aiyptalýshy Qylmystyq kodekstiń «Buzaqylyq» babymen kináli dep tanylyp, olarǵa 2 jyl 6 ai bas bostandyǵyn shekteý jazasy taǵaiyndaldy.
«Aiyptalýshylardyń is áreketteri Qylmystyq kodekstiń 106-baby 3-bóligimen, Orynbasarov pen Ómirálige qatysty is 106-baptyń 3-bóligimen jáne 293-baptyń 2-bóligi 1-2 baptarymen saralandy. Qalǵan sottalýshylar «QR Táýelsizdiginiń 30 jyldyǵyna orai» jariialanǵan raqymshylyq jasaý týraly Zańyna sai qylmystyq jaýapkershilikten bosatyldy», - dedi Sairam aýdandyq sotynyń tóraǵasy Qurmanǵali Dúisebekov.
Sonymen qatar, qaitys bolǵan Elaman Málikovtyń zańdy ókilderi bergen azamattyq talaby ishinara qanaǵattandyrylyp, aiyptalýshylardyń birinen jábirlenýshi tarapqa 4,5 million teńge moraldyq zalal óndirildi. Úkim áli zańdy kúshine engen joq.
Eske salaiyq, osydan 8 ai buryn Sairam aýdanyndaǵy demalys keshenine kelgen 4 jigitti kúzet agenttiginiń qyzmetkerleri tepkige jyqqan bolatyn. Saldarynan jábirlenýshilerdiń biri qaitys bolyp, taǵy úsheýi zardap shekken edi. Keiin kúzet qyzmetiniń ókilderi ustalyp, olarǵa qatysty sot otyrysy birneshe aiǵa sozyldy.
