Sairam aýdanynyń Qarasý aýyldyq okrýgine qarasty Aqbai aýylynda qazaqtyń ulttyq oiyndaryn úiretetin jattyǵý ortalyǵy ashyldy. Aýdandaǵy balalar men jasóspirimderge arnalǵan №3 sport mektebiniń qosymsha ortalyǵynda búgingi tańda úsh jattyqtyrýshy eńbek etýde. Olar jas shabandozdarǵa aýdaryspaq, kókpar tartý jáne teńge ilý sekildi ulttyq sport túrlerin úiretýde.
Aýdandyq dene shynyqtyrý jáne sport bóliminiń basshysy Baýyrjan Asqarov jergilikti jastardyń qazaqtyń tól ónerine degen qyzyǵýshylyǵy joǵary ekenin aitady. Ásirese, balalardyń kókpar tartýǵa degen yntasy zor. Ashylǵanyna kóp bola qoimaǵan ortalyqta qazir 12 men 18 jas aralyǵyndaǵy 60 shabandoz aldaǵy ýaqytta ótetin básekelerge qatysýǵa daiyndalýda. Baýyrjan Asqarov keleshekte aýdanda ulttyq sport túrlerine baǵyttalǵan arnaiy mektep ashý da josparlanyp otyrǵanyn jetkizdi.
Búginde bólimshede 15 arǵymaq bar. Keler jyly olardyń qataryn jiyrmaǵa jetkizý kózdelip otyr. Aita keteiik, munda aýdannyń kez kelgen turǵyny kelip, atpen serýen qura alady.
Elbasy Nursultan Nazarbaev Qazaqstan halqyna arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda dene shynyqtyrý-saýyqtyrý oryndaryn kóbeitý kerektigin ákimderge qatań tapsyrǵan bolatyn. Sonymen qatar, olardyń qoljetimdi bolýyna da kóńil bólýdi aitqan-dy. Sairamdyqtar Memleket basshysynyń osy tapsyrmasyn oryndaýǵa kirisip ketti. Máselen, shabandozdardy daiyndaityn ortalyqta balalar tegin jattyǵýda.
Aýdan jastary fýtboldan da jaqsy jetistikterge jetip júr. Oǵan aýdandyq dene shynyqtyrý jáne sport bólimi men kásipkerler arasynda túzilgen memorandýmnyń tigizip jatqan sharapaty mol deýge bolady. Qaltaly azamattar ózderiniń ieligindegi sport keshenderinde kúndizgi ýaqytta aýyl balalarynyń tegin jattyǵýyna jaǵdai jasai bastady. Solardyń biri – «Arman arena» sport kesheni.
Biyl qyrkúiek aiynda iske qosylǵan keshende bir lekte 60 adam sportpen ainalysa alady. Jeke kásipker Nurǵali Tájibaev nysannyń qurylys jumystaryna 35 mln. teńge jumsapty. Jalpy, aýdanda búginde dál osyndai 16 fýtbol alańy bar. Jyl sońyna deiin olardyń qataryna taǵy ekeýi qosylmaq.
