Sairam aýdanynda sintetikalyq esirtkini saqtady degen kúdikpen jas qyz ustaldy, dep habarlaidy "Ult aqparat" Túrkistan oblysy PD baspasóz qyzmetine silteme jasap.
Politsiia departamenti Esirtki qylmysyna qarsy is-qimyl basqarmasyna belgisiz tulǵadan esirtkige bailanysty habarlama kelip túsedi. Jedel-izdestirý is-sharalaryn júrgizý barysynda Sairam aýdany aýyldarynyń birinde jol boiynda kúdikti jas qyz ustaldy. Ol Shymkent qalasynyń turǵyny bolyp shyqty.
Tekserý kezinde boijetkenniń qol sómkesinen paketke oralǵan ishinde esirtkige uqsas zaty bar 6 dana orama tabyldy. Bolǵan jait QR QK-niń 296-baby 4-bóligi «Esirtki, psihotroptyq zattarmen, sol tektestermen ótkizý maqsatynsyz zańsyz jumys isteý» boiynsha SDTBT-ǵa tirkeldi.
Politseiler tárkilengen aiǵaqty zatty saraptamaǵa joldady. Onyń qorytyndysy boiynsha zattyń jalpy salmaǵy 3 gramnan asatyn «sintetikalyq esirtki» ekeni anyqtaldy.
Qazirgi ýaqytta kúdikti qamaýǵa alynyp, oǵan qatysty sotqa deiingi tergeý amaldary júrgizilýde.
Tergeý barysy oqiǵanyń tolyq mán-jaiyn anyqtaityn bolady.
