Almaty oblystyq politsiia departamentiniń kóshi-qon basqarmasy Qytaida “qysym kórdim” dep málimdep, shekarany zańsyz kesip ótkeni úshin sotqa tartylǵan etnikalyq qazaq Sairagúl Saýytbaiǵa berilgen "pana izdeýshi tulǵa" kýáliginiń merzimin taǵy úsh aiǵa uzartty, dep habarlaidy Azattyq.
28 qańtar kúni oblystyq politsiia departamenti kóshi-qon qyzmeti basqarmasynyń ókili Elmurat Nurseiitov tabystady. Onyń sózinshe, 25 qańtarda merzimi aiaqtalǵan kýálik 25 sáýirge deiin uzartyldy.
Sairagúl Saýytbai kýálik merzimin uzartýda qiyndyq bolmaǵanyn aitty.
Byltyr tamyz aiynda Almaty oblysynyń Panfilov aýdandyq soty "shekarany zańsyz kesip ótti" dep aiyptalǵan Qytai qazaǵy Sairagúl Saýytbaidy alty ai bas bostandyǵynan aiyrýǵa, biraq ony "jazasyn jeńildetetin erekshe jaǵdaiyna" bailanysty shartty jazaǵa almastyrýǵa úkim etken. Osylaisha sot Sairagúl Saýytbaidy Qytaiǵa deportatsiialamai, Qazaqstanda qaldyrǵan. Budan keiin oǵan Qazaqstan biligi úsh ai merzimge "pana izdeýshi tulǵa" kýáligin berip, byltyr qazan aiynda onyń merzimin taǵy úsh aiǵa uzartqan.
Byltyr qazannyń 4-i kúni Almaty oblysynyń ortalyǵy Taldyqorǵan qalasynda kóshi-qon komitetiniń janynan qurylǵan komissiia Sairagúl Saýytbaidyń ózine bosqyn mártebesin berýdi suraǵan ótinishin qarap, ony qanaǵattandyrýdan bas tartqan.
Sairagúl Saýytbai sotta ózine Qytaida "saiasi qysym jasalǵandyqtan shekaradan zańsyz ótýden ózge jol qalmaǵanyn" málimdegen. Saýytbaidyń sózinshe, ol Qytaida qupiia sanalatyn "saiasi úirený ortalyqtarynda" jumys istegen, "memleket qupiiasyn áshkerelemeý" týraly qolhat bergen. Sairagúl Saýytbai Qytaiǵa qaitarylsa, ol elde ózine ólim jazasy kesilýi múmkin ekenin, Qazaqstanda qandai jazaǵa da kelisetinin málimdegen.
