الماتى وبلىستىق پوليتسييا دەپارتامەنتٸنٸڭ كٶشٸ-قون باسقارماسى قىتايدا “قىسىم كٶردٸم” دەپ مەلٸمدەپ, شەكارانى زاڭسىز كەسٸپ ٶتكەنٸ ٷشٸن سوتقا تارتىلعان ەتنيكالىق قازاق سايراگٷل ساۋىتبايعا بەرٸلگەن "پانا ٸزدەۋشٸ تۇلعا" كۋەلٸگٸنٸڭ مەرزٸمٸن تاعى ٷش ايعا ۇزارتتى, دەپ حابارلايدى ازاتتىق.
28 قاڭتار كٷنٸ وبلىستىق پوليتسييا دەپارتامەنتٸ كٶشٸ-قون قىزمەتٸ باسقارماسىنىڭ ٶكٸلٸ ەلمۇرات نۇرسەيٸتوۆ تابىستادى. ونىڭ سٶزٸنشە, 25 قاڭتاردا مەرزٸمٸ اياقتالعان كۋەلٸك 25 سەۋٸرگە دەيٸن ۇزارتىلدى.
سايراگٷل ساۋىتباي كۋەلٸك مەرزٸمٸن ۇزارتۋدا قيىندىق بولماعانىن ايتتى.
بىلتىر تامىز ايىندا الماتى وبلىسىنىڭ پانفيلوۆ اۋداندىق سوتى "شەكارانى زاڭسىز كەسٸپ ٶتتٸ" دەپ ايىپتالعان قىتاي قازاعى سايراگٷل ساۋىتبايدى التى اي باس بوستاندىعىنان ايىرۋعا, بٸراق ونى "جازاسىن جەڭٸلدەتەتٸن ەرەكشە جاعدايىنا" بايلانىستى شارتتى جازاعا الماستىرۋعا ٷكٸم ەتكەن. وسىلايشا سوت سايراگٷل ساۋىتبايدى قىتايعا دەپورتاتسييالاماي, قازاقستاندا قالدىرعان. بۇدان كەيٸن وعان قازاقستان بيلٸگٸ ٷش اي مەرزٸمگە "پانا ٸزدەۋشٸ تۇلعا" كۋەلٸگٸن بەرٸپ, بىلتىر قازان ايىندا ونىڭ مەرزٸمٸن تاعى ٷش ايعا ۇزارتقان.
بىلتىر قازاننىڭ 4-ٸ كٷنٸ الماتى وبلىسىنىڭ ورتالىعى تالدىقورعان قالاسىندا كٶشٸ-قون كوميتەتٸنٸڭ جانىنان قۇرىلعان كوميسسييا سايراگٷل ساۋىتبايدىڭ ٶزٸنە بوسقىن مەرتەبەسٸن بەرۋدٸ سۇراعان ٶتٸنٸشٸن قاراپ, ونى قاناعاتتاندىرۋدان باس تارتقان.
سايراگٷل ساۋىتباي سوتتا ٶزٸنە قىتايدا "ساياسي قىسىم جاسالعاندىقتان شەكارادان زاڭسىز ٶتۋدەن ٶزگە جول قالماعانىن" مەلٸمدەگەن. ساۋىتبايدىڭ سٶزٸنشە, ول قىتايدا قۇپييا سانالاتىن "ساياسي ٷيرەنۋ ورتالىقتارىندا" جۇمىس ٸستەگەن, "مەملەكەت قۇپيياسىن ەشكەرەلەمەۋ" تۋرالى قولحات بەرگەن. سايراگٷل ساۋىتباي قىتايعا قايتارىلسا, ول ەلدە ٶزٸنە ٶلٸم جازاسى كەسٸلۋٸ مٷمكٸن ەكەنٸن, قازاقستاندا قانداي جازاعا دا كەلٸسەتٸنٸن مەلٸمدەگەن.
