Shekarany zańsyz kesip ótti dep aiyptalyp, sot zalynan bosap shyqqan qandasymyz Sairagúl Saýytbai Qazaqstan úkimetinen kómek surady, dep habarlaidy Sputnik Qazaqstan tilshisi.
Belgili jýrnalist Sáýle Ábildahanqyzy feisbýktegi paraqshasynda Sairagúl Saýytbaimen tikelei efirde suqbat uiymdastyrǵan edi. Áńgime barysynda qandasymyz el úkimetinen kómek surady.
"Kúieýim men eki balamnyń bas amandyǵy qatty mazalaidy"
"Mende qazir qolymda tek "pana izdeýshi tulǵa" degen kýálik bar. Oǵan raqmet. Endi úkim kúshine engennen keiin, quzyrly organdardaǵy aǵalarymyz bosqyn kýáligin, odan ári azamattyq alýǵa kómektesse degen tilegim bar", — dedi Sairagúl Saýytbai.
Osy oraida ol qazir ózin mazalap júrgen máselege toqtaldy.
"Qazir meniń bas amandyǵymnyń ózi úlken másele bolyp tur. Tek meniń ǵana emes, jubaiym men eki kishkentai balamnyń bas amandyǵy da meni qatty mazalaidy", — dedi qandasymyz.
Suqbat barysynda belgili bolǵandai, advokat Abzal Quspan Sairagúl Saýytbaidyń bas amandyǵyn qorǵaý týraly quzyrly organdarǵa ótinish joldaǵan.
Sairagúl Saýytbaidyń isi
Eske sala ketsek, eki jyl kórmegen otbasymen qaýyshý úshin shekarany zańsyz kesip ótip, túrmege túsken qandasymyz Sairagúl Saýytbaidyń taǵdyryna barsha qazaq jurty alańdaǵan edi. Qytai azamatyn osy jyldyń mamyrynda Qazaqstan Ulttyq qaýipsizdik komitetiniń qyzmetkerleri "Qorǵas keden beketin zańsyz buzyp ótti" degen aiyppen úiinen ustap alyp ketken.
Belgili bolǵandai, erli-zaiypty Ýáli Islám men Sairagúl Saýytbai eki balasymen birge Qazaqstanǵa 2016 jyly kóship kelgisi kelipti. Alaida, Sairagúldiń aitýynsha, ol Qytaida qupiia sanalatyn "saiasi úirený ortalyqtarynda" jumys istegen, "memleket qupiiasyn áshkerelemeý" týraly qolhat bergen. Sondyqtan Qytai ony jibermei qoiady. Al jubaiy men balalary Qazaqstan azamattyǵyn alǵan.
Etnikalyq qazaq Sairagúl Saýytbaiǵa qatysty sot úkimi 1 tamyzda shyqty. Almaty oblysynyń Panfilov aýdandyq soty qandasymyzdy 6 aiǵa shartty túrde bas bostandyǵynan aiyryp, sot zalynan bosatty. Ol Qytaiǵa berilmeidi. Tek alty ai kúieýiniń mekenjaiy boiynsha probatsiialyq baqylaýda bolady.
Sairagúl Saýytbaiǵa azamattyq berile me?
Birinshi kezekte, bosqyn mártebesin alý kerek. Bul másele keminde úsh ai qaralady. Kelesi qadam — Qazaqstan azamattyǵyn alý.
"Sairagúl Saýytbaiǵa kóshi-qon politsiiasy bergen kýálik Qazaqstannyń azamattyǵyn alýdy tezdetýge kómektesedi. Azamattyq alýǵa bailanysty barlyq qujat tiisti organdarǵa tapsyryldy, ótinishter jazyldy. Endigi kezekte bul másele QR prezidenti janyndaǵy memlekettik komissiia tarapynan sheshiledi", — deidi advokat Abzal Quspan.
