شەكارانى زاڭسىز كەسٸپ ٶتتٸ دەپ ايىپتالىپ, سوت زالىنان بوساپ شىققان قانداسىمىز سايراگٷل ساۋىتباي قازاقستان ٷكٸمەتٸنەن كٶمەك سۇرادى, دەپ حابارلايدى Sputnik قازاقستان تٸلشٸسٸ.
بەلگٸلٸ جۋرناليست سەۋلە ەبٸلداحانقىزى فەيسبۋكتەگٸ پاراقشاسىندا سايراگٷل ساۋىتبايمەن تٸكەلەي ەفيردە سۇقبات ۇيىمداستىرعان ەدٸ. ەڭگٸمە بارىسىندا قانداسىمىز ەل ٷكٸمەتٸنەن كٶمەك سۇرادى.
"كٷيەۋٸم مەن ەكٸ بالامنىڭ باس اماندىعى قاتتى مازالايدى"
"مەندە قازٸر قولىمدا تەك "پانا ٸزدەۋشٸ تۇلعا" دەگەن كۋەلٸك بار. وعان راقمەت. ەندٸ ٷكٸم كٷشٸنە ەنگەننەن كەيٸن, قۇزىرلى ورگاندارداعى اعالارىمىز بوسقىن كۋەلٸگٸن, ودان ەرٸ ازاماتتىق الۋعا كٶمەكتەسسە دەگەن تٸلەگٸم بار", — دەدٸ سايراگٷل ساۋىتباي.
وسى ورايدا ول قازٸر ٶزٸن مازالاپ جٷرگەن مەسەلەگە توقتالدى.
"قازٸر مەنٸڭ باس اماندىعىمنىڭ ٶزٸ ٷلكەن مەسەلە بولىپ تۇر. تەك مەنٸڭ عانا ەمەس, جۇبايىم مەن ەكٸ كٸشكەنتاي بالامنىڭ باس اماندىعى دا مەنٸ قاتتى مازالايدى", — دەدٸ قانداسىمىز.
سۇقبات بارىسىندا بەلگٸلٸ بولعانداي, ادۆوكات ابزال قۇسپان سايراگٷل ساۋىتبايدىڭ باس اماندىعىن قورعاۋ تۋرالى قۇزىرلى ورگاندارعا ٶتٸنٸش جولداعان.
سايراگٷل ساۋىتبايدىڭ ٸسٸ
ەسكە سالا كەتسەك, ەكٸ جىل كٶرمەگەن وتباسىمەن قاۋىشۋ ٷشٸن شەكارانى زاڭسىز كەسٸپ ٶتٸپ, تٷرمەگە تٷسكەن قانداسىمىز سايراگٷل ساۋىتبايدىڭ تاعدىرىنا بارشا قازاق جۇرتى الاڭداعان ەدٸ. قىتاي ازاماتىن وسى جىلدىڭ مامىرىندا قازاقستان ۇلتتىق قاۋٸپسٸزدٸك كوميتەتٸنٸڭ قىزمەتكەرلەرٸ "قورعاس كەدەن بەكەتٸن زاڭسىز بۇزىپ ٶتتٸ" دەگەن ايىپپەن ٷيٸنەن ۇستاپ الىپ كەتكەن.
بەلگٸلٸ بولعانداي, ەرلٸ-زايىپتى ۋەلي ٸسلەم مەن سايراگٷل ساۋىتباي ەكٸ بالاسىمەن بٸرگە قازاقستانعا 2016 جىلى كٶشٸپ كەلگٸسٸ كەلٸپتٸ. الايدا, سايراگٷلدٸڭ ايتۋىنشا, ول قىتايدا قۇپييا سانالاتىن "ساياسي ٷيرەنۋ ورتالىقتارىندا" جۇمىس ٸستەگەن, "مەملەكەت قۇپيياسىن ەشكەرەلەمەۋ" تۋرالى قولحات بەرگەن. سوندىقتان قىتاي ونى جٸبەرمەي قويادى. ال جۇبايى مەن بالالارى قازاقستان ازاماتتىعىن العان.
ەتنيكالىق قازاق سايراگٷل ساۋىتبايعا قاتىستى سوت ٷكٸمٸ 1 تامىزدا شىقتى. الماتى وبلىسىنىڭ پانفيلوۆ اۋداندىق سوتى قانداسىمىزدى 6 ايعا شارتتى تٷردە باس بوستاندىعىنان ايىرىپ, سوت زالىنان بوساتتى. ول قىتايعا بەرٸلمەيدٸ. تەك التى اي كٷيەۋٸنٸڭ مەكەنجايى بويىنشا پروباتسييالىق باقىلاۋدا بولادى.
سايراگٷل ساۋىتبايعا ازاماتتىق بەرٸلە مە?
بٸرٸنشٸ كەزەكتە, بوسقىن مەرتەبەسٸن الۋ كەرەك. بۇل مەسەلە كەمٸندە ٷش اي قارالادى. كەلەسٸ قادام — قازاقستان ازاماتتىعىن الۋ.
"سايراگٷل ساۋىتبايعا كٶشٸ-قون پوليتسيياسى بەرگەن كۋەلٸك قازاقستاننىڭ ازاماتتىعىن الۋدى تەزدەتۋگە كٶمەكتەسەدٸ. ازاماتتىق الۋعا بايلانىستى بارلىق قۇجات تيٸستٸ ورگاندارعا تاپسىرىلدى, ٶتٸنٸشتەر جازىلدى. ەندٸگٸ كەزەكتە بۇل مەسەلە قر پرەزيدەنتٸ جانىنداعى مەملەكەتتٸك كوميسسييا تاراپىنان شەشٸلەدٸ", — دەيدٸ ادۆوكات ابزال قۇسپان.
