Tamyzdyń 1-i kúni Almaty oblysynyń Panfilov aýdandyq sotynda Qytai azamaty, "shekaradan zańsyz ótti" dep aiyptalǵan etnikalyq qazaq Sairagúl Saýytbaidy Qytaiǵa qaitarý máselesi boiynsha sot otyrysy jalǵasty, dep jazady Sputniknews.kz tilshisi.
Otyrys barysynda prokýror Sairagúl Saýytbaidy Qytaiǵa bermeýdi jáne shartty jaza kesýdi surady.
Otyrys sońynda Sairagúl Saýytbai Qytaida adam nanǵysyz qiyn kúnderdi basynan keshirgenin aitty.
Sairagúl Saýytbai 2016 jyly tarihi otanyna otbasymen birge kóship kelmek bolǵan. Alaida Qytaida Sairagúldiń tólqujatyn tartyp alyp, Qazaqstanǵa ótýge múmkindik bermegen.
"Maǵan "sen kommýnistik partiiadasyń jáne Qytaida memlekettik qyzmette bolǵansyń. Artynan otbasyńa baryp-kelip turasyń, oǵan ruqsat beremiz. Ótinish jazyp bosap ketýlerińe de bolady" dep aitty. Men sol kelisim boiynsha Qytaida qaldym, biraq tólqujatymdy sodan keiin bergen joq", — deidi Saýytbai.
"Meniń zańsyz áreket jasaǵanyma Qytai kináli"
Saýytbaidyń aitýynsha, onyń zańsyz áreket jasaǵanyna Qytai kináli.
"Adam ómirge bir-aq ret keledi. Ol ómirdi men nege Qytaida súrýim kerek? Ózimniń kózimdi joiyp jiberýine nege qarap turýym kerek degen oiǵa keldim", — deidi Sairagúl Saýytbek.
"Kelisimge qarsy shyqsam, baratyn jerim túrme edi"
Balalaryn bir kórýge zar bolyp júrgende Sairagúldi qupiia organda jumys isteisiń dep aparǵan.
"Bul kelisimge qarsy shyqsam, baratyn jerim túrme edi", — deidi Sairagúl Saýytbai.
Sairagúl Saýytbaidyń isi boiynsha sot otyrysy tańǵy 10.00-de bastaldy. Bir jarym saǵatqa jalǵasqan sot otyrysynan keiin Tóraǵa sheshimniń 15.30-da shyǵatynyn aitty.
