1 tamyz kúni bostandyqqa shyqqan qandasymyz Sairagúl Saýytbai feisbýkte tikelei efirde suqbat berip, biraz suraqqa jaýap berdi, dep habarlaidy Sputnik Qazaqstan tilshisi.
Qandasymyzben suqbatty belgili jýrnalist Sáýle Ábildahanqyzy uiymdastyrdy. Áńgime barysynda Sairagúl Saýytbai oń qolyndaǵy "Alla" degen jazýy týraly aitty.
"Anam bul jazý týǵan kezden bar dep aityp otyratyn. Bala súie almaǵan otbasylar asyrap almaqshy bolǵan. Biraq ata-anam ózderi yrymdap, bermegen jaiy bar. Bes jasqa deiin týystarymnyń qolynda tárbielendim, odan keiin ózderi qaityp alyp ketti", — deidi Sairagúl Saýytbai.
Arabsha jazylǵan "Alla" jazýy Sairagúldiń oń qolynda, bas barmaǵynyń joǵarǵy tusynda ornalasqan. Bir qyzyǵy, kúizeliske túsip, qatty qinalǵan sátte jazý kádimgidei anyq kórinip turady eken.
"Men qatty qinalyp, jylaǵan sátterimde osy jazý badyraiyp, anyq kórinedi. Sol kezde óz-ózimdi sabyrǵa shaqyryp, eńsemdi tiktep alamyn. Álgi jazýdy úsh ret súiip qoiamyn. "Alla Taǵala tóbemde tur ǵoi, jylamaiynshy, bári jaqsy bolyp ketedi" dep óz-ózimdi jubatamyn", — deidi qandasymyz.
Sáýle Ábildahanqyzy da Sairagúldiń qolyndaǵy jazýdy kórgende, tańdanysyn jasyrmady.
"O bastan Alla Taǵala seni bir missiiaǵa daiyndap, taǵaiyndap jibergen siiaqty… Demek biz Sairagúldi qorǵaýymyz kerek shyǵar", — dedi jýrnalist.
Sairagúl Saýytbaidyń isi
Eske sala ketsek, eki jyl kórmegen otbasymen qaýyshý úshin shekarany zańsyz kesip ótken qandasymyz Sairagúl Saýytbaidyń taǵdyryna barsha qazaq jurty alańdaǵan edi. Qytai azamatyn osy jyldyń mamyrynda Qazaqstannyń Ulttyq qaýipsizdik komitetiniń qyzmetkerleri "Qorǵas keden beketin zańsyz buzyp ótti" degen aiyppen úiinen ustap alyp ketken.
Belgili bolǵandai, erli-zaiypty Ýáli Islám men Sairagúl Saýytbai eki balasymen birge Qazaqstanǵa 2016 jyly kóship kelgisi kelipti. Alaida Sairagúl Saýytbaidyń Qytaida memlekettik qyzmette isteýine bailanysty jergilikti bilik pasportyn alyp qoiǵan. Sondyqtan ol Qazaqstan azamattyǵyna qujat tapsyra almaidy.
Etnikalyq qazaq Sairagúl Saýytbaiǵa qatysty sot úkimi 1 tamyzda shyqty. Almaty oblysynyń Panfilov aýdandyq soty qandasymyzdy 6 aiǵa shartty túrde bas bostandyǵynan aiyryp, sot zalynan bosatty. Ol Qazaqstan aýmaǵynan shyǵarylmaidy. Tek alty ai kúieýiniń mekenjaiy boiynsha probatsiialyq baqylaýda bolady.
