Sailaýaldy ýádesin oryndamaǵan depýtatty sailaýshylar keri qaitarýǵa múmkindik alady. Bul týraly Konstitýtsiialyq keńestiń apparat jetekshisi Baqyt Nurmuhanov aitty, dep habarlaidy QazAqparat.
«Respýblika Prezidenti Qasym-Jomart Toqaevtyń biylǵy Qazaqstan halqyna Joldaýy elimizde júrgizilip jatqan demokratiialyq protsesterge tyń serpin berdi. Onda Jańa Qazaqstannyń kelbeti, ony qurý baǵytynda turǵan mindetter jáne ol mindetterdi sheshý joldary anyq kórsetildi. Aitylǵan bastamalardyń kópshiligi Ata zańda bekitilgen qoǵam men memlekettiń negizderin qozǵaidy. Osy maqsatta qurylǵan jumys toby Konstitýtsiiaǵa túzetýlerdiń jobasyn usyndy. Jumys tobyna memlekettik organdarmen qatar úkimettik emes uiymdardyń ókilderi jáne elimizdegi tanymal zańger-ǵalymdar qatysty. Zań jobasynda qazirgi tańda elimizde qalyptasqan sýperprezidenttik basqarý nysanyn odan ary jetildirý kózdelgen. Bul maqsatty Memleket basshysy óziniń birqatar ókilettigin basqa organdarǵa beredi nemese olarmen kelise otyryp atqarady. Bul sońǵy jyldary elimizde júrgizilip jatqan ortalyqsyzdandyrý protsesiniń jalǵasy», - dedi ol Ortalyq kommýnikatsiialar qyzmetindegi baspasóz máslihatynda.
Sonymen qatar, ol 2017 jyly elimizde bolǵan úshinshi Konstitýtsiialyq reformanyń nátijesinde Memleket basshysy óziniń birqatar ókilettigin Parlament pen Úkimetke bergenin eske saldy.
«Parlament pen jergilikti ókildi organdardyń rólin kúsheitý kózdelgen. Palatalardy jasaqtaý tártibi men olardyń fýnktsiialarynda da da eleýli ózgerister bar. Prezidenttiń Senattaǵy kvotasy 15-ten 10-ǵa deiin qysqartylyp, onyń 5-eýin Qazaqstan halqy Assambleiasy usynatyn bolady. Májilis sailaýynda aralas sailaý júiesi engiziledi. Májilistiń 30 paiyz depýtattary 1 mandatty aýmaqtyq sailaý okrýgteri boiynsha sailanady jáne sailaýaldy ýádesin oryndamaǵan depýtatty sailaýshylar keri qaitarýǵa múmkindik alady», - dedi Baqyt Nurmuhanov.
