QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin sailaý protsesin tolyqtai tsifrlandyrý múmkindigine baǵa berdi, dep habarlaidy QazAqparat.
«Keleshekte ýchaskege tirkeý men shyǵarýdy onlain jasaýǵa bolady. Bul protsess kúrdeli emes. Daýys berý protsesiniń ózine qatysty aitar bolsam, onda bul protsesti bir aidyń ishinde jasaý múmkin emes. Ol úshin tehnologiialyq turǵydan daiyndyq bolýy tiis. Ortalyq sailaý komissiiasy da daiyndalýy qajet. Protsesterdi birneshe qyrynan zerdeleý de kerek. Daýys berý protsesiniń ózin ǵana emes», - dedi Baǵdat Mýsin Shetel investorlary keńesiniń kezekti otyrysynan keiin BAQ ókilderiniń saýalyna orai.
Onyń atap ótýinshe, baiqaýshylardy da qaperge alý kerek.
«Biz bárin túgel avtomattandyra alamyz. Al baiqaýshylar qalai qadaǵalaidy ony? Iaǵni, daýys berý protsesiniń birneshe qyry bar. Baiqaýshy bir adamnyń qaǵazdy alǵanyn, qol qoiǵanyn, nómirlegenin kóredi. Al elektrondy túrde munyń bári qalai uiymdastyrylady? Tsifrlandyrýshy retinde bizdiń daiyn ekenimiz túsinikti. Biraq, másele basqada. Búkil protsesti tsifrlandyrǵan tym bolmaǵanda bir eldi atańyzdarshy. Daýys berý protsesin halyqaralyq ádister turǵysynan da zerdeleý kerek. Óitkeni, tek tsifrlandyryp, endi osylai bolady dep aita almaimyz. Protsedýranyń ózin elektrondy túrde jasaý qiyn emes. Alaida, búkil halyqaralyq qoǵamdastyq ony rastaityndai etip jasaý kerek», - dedi ministr.
