Ortalyq sailaý komissiiasynyń múshesi Erlan Daýylbaev daýys berý nysanynan tys azamattar sailaýda óz tańdaýyn qalai jasai alatynyn aityp berdi, dep habarlaidy QazAqparat.
«Eger sailaýshy daýys berý nysanyna dertine, otbasynyń naýqas bir múshesine qaraýyna bailanysty kele almasa nemese alysta bolsa, ol ýchaskelik sailaý komissiiasyna jergilikti ýaqyt boiynsha 12 saǵat buryn jazbasha túrde ótinim bere alady», - dedi Erlan Daýylbaev.
Onyń aitýynsha úiinen shyǵa almaityn sailaýshylar úshin arnaiy qozǵalmaly daýys berý jáshigi qoldanylady. Ýchaskelik sailaý komissiiasynyń hatshysy aldyn ala kelgen ótinimder boiynsha eki qozǵalmaly daýys berý jáshigin ázirlep, jáshikti alyp júretin komissiia músheleriniń qozǵalys baǵdaryn qurady.
«Eger ótinim sonshalyqty kóp bolmasa, tek bir ǵana jáshikti paidalanýǵa bolady. Úiinen daýys beretin azamattarǵa baratyn ýchaskelik sailaý komissiiasynyń múshelerine daýys berý biýlleteni, azamattyń ótinimi men úiinen daýys beretin azamattardyń mekenjailarynyń tizimi beriledi. Bul rette ýchaskelik sailaý komissiiasynyń múshelerine jetkilikti deńgeide daýys berý biýlleteni berilýi kerek. Qozǵalmaly jáshikti ýchaskelik sailaý komissiiasynyń eki múshesi alyp júredi. Daýys berý nysanynan tys daýys beriletin úilerge shyǵar kezde sailaý komissiiasynyń tóraǵasy saiasi partiialardyń senimdi ókilin, baiqaýshylar men BAQ ókilderin shaqyrady. Qozǵalmaly jáshikterdi alyp júretin komisisia múshelerimen birge saiasi partiialardyń senimdi ókilderi, baiqaýshylar jáne BAQ ókilderi birge júrýge quqyly», - deidi ol.
