Qazaqstan zańnamasyna sáikes, sailaý kezinde qoǵamdyq pikirge saýalnamany tirkelgen zańdy tulǵalar ǵana júrgize alady. Bul týraly búgin QR Ortalyq sailaý kommissiiasynyń múshesi Anastasiia Shegortsova aitty, dep habarlaidy QazAqparat.
«Sailaý zańnamasyna sáikes, qoǵamdyq pikirge saýalnamany Qazaqstan zańnamasymen tirkelgen zańdy tulǵalar júrgize alady. Sonymen qatar qoǵamdyq pikirge saýalnama júrgizý boiynsha 5 jyldyq tájiribesiniń bolýy týraly talap qarastyrylǵan. Eń bastysy, tiisti qujattarynyń kóshirmeleri tirkelgen habarlama Ortalyq sailaý komissiiasyna aldyn ala túsýi tiis», - dedi ol OSK-de ótken baspasóz máslihaty barysynda.
Onyń atap ótýinshe, OSK-ge jiberetin atalǵan habarlamada saýalnama júrgizýge qatysatyn mamandar týraly málimetter mindetti túrde kórsetilýi qajet. Mamannyń bul saladaǵy jumys tájiribesi, qoǵamdyq pikirge saýalnama alý ótkiziletin óńir, zertteý barysynda qoldanylatyn saraptama týraly da málimetter kórsetilýi tiis.
Sonymen qatar zańda sailaýmen bailanysty qoǵamdyq pikir saýalnamasynyń nátijesin jariialaýǵa qatysty da talap bar. BAQ saýalnama júrgizgen zańdy tulǵany, saýalnamaǵa tapsyrys berip, tólem jasaǵan tulǵany mindetti túrde kórsetýi kerek.
«Munan bólek, ornyn, saýalnama ótkizý ýaqytyn, aqparatty jinaý jáne saýaldy naqty qurý ádisin, saýalnama alynǵandar sany men nátijelerdiń qatelik koeffitsientin kórsetýge mindetti. Munyń barlyǵy - zań talaby. Daýys berýge deiingi 5 kúnniń ishinde, sonymen qatar daýys berý kúninde nátijelerdi jariialaýǵa jol berilmeidi. Bul normany buzǵany úshin ákimshilik jaýapkershilik qarastyrylǵan», - dedi Anastasiia Shegortsova.
Aita keteiik, 21 qazanda QR Prezidenti Qasym-Jomart Toqaev Parlamenti Májilisi depýtattarynyń kezekti sailaýyn taǵaiyndaý týraly Jarlyqqa qol qoidy.
