Qazaqstanda sailaý komissiialarynyń múshelerin qashyqtan oqytý jáne testileý jumystary júrýde. Bul týraly Ortalyq sailaý komissiiasynyń hatshysy Sabila Mustafina aityp berdi, dep habarlaidy QazAqparat.
«Elektoraralyq kezeńde Ortalyq sailaý komissiiasynyń qyzmeti eki baǵytqa toptalady. Bul – úzdiksiz elektoraldyq oqytý arqyly turaqty negizde jumys isteitin aýmaqtyq sailaý komissiialary músheleriniń kásibilik deńgeiin arttyrý jáne buǵan qajetti shart retinde ádistemelik keshender men oqytý materialdaryn ázirleý. Atap ótken jón, «QR sailaý týraly» Konstitýtsiialyq zań elektoraldyq oqytýdy uiymdastyrýdyń quqyqtyq bazasy bolyp sanalady – 12, 14 jáne 18-bapta sailaý júiesi organdarynyń ókilettikterinde sailaý protsesine qatysýshylardy oqytýdy uiymdastyrý jáne ótkizý kózdelgen. Sailaý komissiialary múshelerin jergilikti biýdjet qarajatyna oqytýdy uiymdastyrý úshin quqyqtyq retteý «Qazaqstan Respýblikasyndaǵy jergilikti memlekettik basqarý jáne ózin-ózi basqarý týraly» Zańnyń 27 jáne 31-baptarynda jáne Biýdjet kodeksiniń 54 jáne 55-baptarynda kórsetilgen. Jyl saiyn qabyldanatyn elektoraldyq oqytýdyń «jol kartasyna» sáikes, sailaýdy uiymdastyrýshylar, ortalyq jáne jergilikti atqarýshy organdardyń memlekettik qyzmetshileri, sot júiesiniń, quqyq qorǵaý organdarynyń qyzmetkerleri jáne elektoraldyq protsestiń basqa da qatysýshylary úshin oqytý sharalary ótkiziledi», - dedi S. Mustafina Ortalyq sailaý komissiiasynda ótken otyrysta.
Onyń aitýynsha, biyl elektoraldyq oqytýdyń «jol kartasy» aiasynda Ortalyq sailaý komissiiasy respýblikalyq jáne óńirlik deńgeilerde sailaý protsesine qatysýshylar arasynan myńnan astam adamdy qamti otyryp, 24 oqytý sharasyn, dárister, seminarlar jáne treningter ótkizgen.
«Jol kartasyn» júzege asyrýda Bilim jáne ǵylym ministrligi, Aqparat jáne qoǵamdyq damý ministrligi, QR Prezidenti janyndaǵy Memlekettik basqarý akademiiasy, Joǵarǵy Sot janyndaǵy Sot tóreligi akademiiasy, Bas prokýratýra janyndaǵy Quqyq qorǵaý organdary akademiiasy, Kásibi damý institýty, QR kásibi tarihshylary men qoǵamtanýshylar ligasy, «Jastar» ǵylymi-zertteý ortalyǵy, QR joǵary oqý oryndarynyń qaýymdastyǵy jáne jetekshi ýniversitetter men akademiialar OSK áriptesteri bolyp otyr.
Spiker habarlaǵandai, áriptestik negizde TMD-ǵa qatysýshy memleketterdiń Parlamentaralyq Assambleiasy deńgeiinde halyqaralyq sharalar da júzege asyrylýda.
Atap aitqanda, Halyqaralyq demokratiiany damytýdyń monitoringi institýtymen, RF OSK janyndaǵy reseilik sailaý tehnologiialaryn oqytý ortalyǵymen tabysty jobalar iske asyryldy, sondai-aq shet memleketterdiń Ortalyq sailaý komissiialarynyń halyqaralyq konferentsiialaryna qatysqan.
