Búgin Ortalyq sailaý komissiiasynyń otyrysynda 20 qarashada ótetin prezident sailaýyna kandidattardyń pikirsaiysynyń reglamenti men qatysýshylar tizimi bekitildi. Televiziialyq pikirsaiys 11 qarashada «Habar» telearnasynyń efirinde ótedi, dep habarlaidy QazAqparat.
«QR Ortalyq sailaý komissiiasynyń qaýlysymen bekitilgen sailaý aldyndaǵy pikirsaiysty ótkizý qaǵidalary men sharttaryna sáikes, OSK reglamentimen kelisedi jáne sailaý aldyndaǵy pikirsaiysqa qatysýshylardyń tizimin bekitedi. Qazirgi ýaqytta«Habar» telearnasy prezidenttikke kandidattardyń sailaý aldyndaǵy pikirsaiysyn ótkizý reglamentin ázirledi. Reglament jobasy OSK-ge kelisýge usynyldy. Jobada sailaý aldyndaǵy pikirtalasty ótkizý talaptary qarastyrylady», - dedi QR OSK múshesi Anastasiia Shegortsova.
Onyń atap ótýinshe, reglamentte qatysýshylarǵa qoiylatyn jalpy talaptar, olardyń sóileý tártibi, ótkizý tili jáne efir ýaqytyn belgileý kózdelgen.
«Reglamentke sáikes, prezidenttikke kandidattyń sailaý aldyndaǵy pikirsaiysy 4 raýndta ótkiziledi. Raýndtarǵa sáikes, pikirsaiysqa qatysýshylar ózderiniń sailaý baǵdarlamasymen sóz sóileýge, qarsylastaryna suraq qoiýǵa, sailaýshylardyń suraqtaryna jaýap berýge, sonymen qatar sailaýshylarǵa úndeý jasaýǵa múmkindik alady. Reglament jobasy sailaý aldyndaǵy pikirsaiystardy ótkizý qaǵidalary men sharttaryna sáikes keledi», - dedi ol.
Onyń atap ótýinshe, sailaý aldyndaǵy pikirsaiystar men pikirtalastarǵa qatysý úshin kandidatýralardy QR prezidenttigine kandidattardyń sailaý shtabtary usyndy.
«Alynǵan málimet negizinde televiziialyq pikirsaiysqa qatysýshylardyń kelesi quramy usynylady: Ábden Qaraqat Jaqsylyqqyzy, Áýesbaev Nurlan Satybaldyuly, Dairabaev Jigýli Moldahalyquly, Qajyken Meiram Zekeshuly, Qoshanov Erlan Jaqanuly, Tursynbekova Saltanat Parhatqyzy. Osylaisha, pikirsaiys ótkizý reglamentimen kelisý, sonymen qatar televiziialyq pikirsaisqa qatysýshylardyń tizimin bekitý týraly qaýly jobasy qaraýǵa usynylady», - dedi OSK múshesi.
Ortalyq sailaý komissiiasynyń músheleri 20 qarashaǵa belgilengen kezekten tys prezident sailaýynda sailaý aldyndaǵy televiziialyq pikirsaiys uiymdastyrý jáne ótkizý týraly qaýly qabyldady.
