"PetroQazaqstan Oil Prodakts" JShS qyzmetkerleri QR Prezidenttigine kandidat Meiram Qajykenge "Suranys qatań bolady" degen jazýy bar qorǵanysh kaskasyn syilady, dep habarlaidy úmitker shtabynyń baspasóz qyzmeti.
Úgit-nasihat naýqany aiasynda kandidat munai óńdeý kásipornynyń eńbek ujymymen kezdesip, óziniń sailaýaldy tuǵyrnamasy týraly aityp berdi.
"Men respýblikanyń árbir azamatynyń ómir súrý sapasyn jaqsartý jáne onyń quqyqtary men múddelerin saqtaý úshin reformalar usynamyn. Áielderdiń zeinetkerlik jasyn tómendetý, qyzmeti qaýipti jáne ziiandy eńbek jaǵdailarymen bailanysty qyzmetkerlerdiń erte zeinetke shyǵýyn bekitý, jalaqynyń ashyq jáne túsinikti eseptelýin qamtamasyz etý qajet. Sol kezde ózgerister kórinedi", - dedi ol.
Shaǵyn jáne orta biznesti qoldaý ekonomikalyq reformalardyń basty bóliminde tur. Meiram Qajykenniń aitýynsha álemniń damyǵan elderinde,negizgi jumys berýshi - kásipker bolyp tabylady. Al Qazaqstanda memlekettik qurylymdardaǵy qyzmetkerler sany kóp.
Kásipodaqtarǵa, jumys berýshiler/kásipkerler qaýymdastyǵyna, memlekettik qurylymdarmen ózara is-qimyl kezinde teń jaǵdai jasaý úshin olardyń mártebesin arttyrýǵa erekshe nazar aýdarý qajet, dep naqtylady kezdesý barysynda kandidat.
"Bilikti ortalyqsyzdandyrý, tolyqqandy azamattyq qoǵam qurý, quqyq qorǵaý organdary qyzmetiniń ashyqtyǵy, Qazaqstannyń basqa etnostarynyń tilderine nuqsan keltirmesten qazaq tilin damytý – osy mindetterdiń barlyǵy oryndalady. Siz buǵan kýá bolasyz", - dep sendirdi Meiram Qajyken.
Kezdesý sońynda zaýyt qyzmetkerleri úmitkerge "Suranys qatań bolady!" degen jazýy bar kaska syilady.
"Prezident bolǵan kezde, siz baratyn alǵashqy kásiporyn bizdiń munai óńdeý zaýyty bolady dep ýáde berińiz. Sizge densaýlyq, sáttilik tileimiz! Iske sát! Bizdiń zaýytty eske alyp turýyńyz úshin qorǵanys kaskasyn syilaǵymyz keledi", - dedi kásiporyn qyzmetkeri.
Aita keteiik, "PetroQazaqstan Oil Prodakts" JShS quramyna "PetroQazaqstan" munai kompaniialary toby kiredi, olardyń aktsionerleri "Qytai Ulttyq munai korporatsiiasy" jáne "QazMunaiGaz" ulttyq kompaniiasy bolyp tabylady.
