Angliiada jalpyhalyqtyq lokdaýn, al Londonda tótenshe jaǵdai jariialanǵan. Koronavirýstyń mýtatsiiaǵa ushyraǵan jańa túrine bailanysty jaǵdai ýshyǵyp tur. Biraq jergilikti bilik Tumandy Albionda ýaqytsha turyp jatqan otandastarymyzǵa sailaý ýchaskesi ornalasqan Qazaqstannyń Ulybritaniiadaǵy elshiligine kelip, daýys berýge ruqsat etti, dep habarlaidy "Ult aqparat".
Qazaqstandyqtardyń kópshiligi tańerteń tańdaý jasap úlgerdi. Aita keteiik, lokdaýn men qatań shekteýlerge qaramastan daýys berýshilerdiń geografiiasy aýqymdy.
Halyq Ulybritaniianyń túkpir-túkpirinen aǵylýda: Kembridj, Ýorik, Edinbýrg, Manchester jáne árine Londonnan.
Eger basqa qalalardan kelýshiler qaýipsizdik sharalaryn saqtaý úshin avtobýs pen poiyzdyń ornyna kólik jaldap ýchaskege jetse, londondyq qazaqtar velosiped teýip kelip jatyr.
Ýchaskedegiler sailaýdyń ádiletti ári ashyq jáne halyqaralyq standarttarǵa sai ótýi úshin qoldan kelgenniń bárin jasap jatyr.
«Sanitarlyq talaptardy saqtai otyryp, qazaqstandyqtardyń shetelde daýys berý konstitýtsiialyq quqyǵyn júzege asyrý úshin barlyq jaǵdaidy jasap jatyrmyz. Aita ketý kerek, Qazaqstan azamattary ádettegidei belsendilik tanytyp otyr. Sailaý ýchaskesiniń ashylǵany týraly aqparat jariialanǵan sátten bastap 500-den astam sailaýshy tirkeldi. Sonymen qatar sailaýǵa aldyn ala tirkelmegen azamattardyń da qatysýy kútilýde. Sailaýshylardyń sany budan da kóp bolýy múmkin edi. Biraq ókinishke qarai lokdaýn keri áserin tigizdi» deidi №244 sailaý ýchaskesiniń tóraǵasy Janbolat Úsenov.
Qatań karantin shekteýlerine qaramastan halyqtyń kóńil-kúii kóterińki. Londonda kóshede qazaqstandyqtardy jii kezdestire bermeisiz.
Sondyqtan sailaýshylar bir-birimen áńgimeleskisi keledi. Biraq áleýmettik araqashyqtyq meilinshe saqtalyp jatyr.
«Men - jumys babymen Ulybritaniiada ýaqytsha turyp jatqan Qazaqstan azamatymyn. Londonda otbasymmen turamyn. Búgingi sailaý eldiń berekesi men birligin arttyrady dep senemin. Shetelde júrsek te, osyndai mańyzdy naýqannan tys qalmaiyq dep joldasym ekeýmiz qoǵamdyq kólikti paidalanbai, kovid erejelerin saqtap, velosipedpen keldik» deidi sailaýshylardyń biri Qyzylgúl Júsipova.
Ýchaskege kireberiste daýys berýshilerdiń temperatýrasy tekseriledi, sanitaizer barlyq jerge qoiylǵan. Maska men qolǵaptar da bar.
Tipti qalamsaptar da paidalanylǵannan keiin zalalsyzdandyrylady.
Ókinishke qarai, bul jyly elshilikte daýys berýshilerge qazaqtyń ulttyq taǵamdary usynylmaidy. Óitkeni sanitarlyq talaptarǵa sáikes ruqsat etilmegen.
Sailaý London ýaqyty boiynsha keshki 8-de, iaǵni Nur-Sultan ýaqytymen túngi 2-de aiaqtalady.
