QR Prezidenttigine kandidattyń memlekettik tildi erkin meńgergenin anyqtaityn lingvistikalyq komissiia múshesi Ǵarifolla Esim «Uly dala qyrandary» respýblikalyq qoǵamdyq birlestigi atynan úmitker Sádibek Túgeldiń emtihan nátijesin jariialady, dep habarlaidy QazAqparat tilshisi.
Onyń aitýynsha, úmitker tapsyrmalardy berilgen ýaqytta oryndady jáne qosymsha ýaqytty qajet etken joq.
«Emtihan talabyna sáikes, úmitker birinshi kezeńde shyǵarma jazýy tiis. Sádibek Túgel «Táýelsiz memleketter dostastyǵy: tarihy jáne búgini» taqyrybyn tańdap aldy jáne memlekettik tildi erkin meńgergenin kórsetti. Árine, keibir emle qateleri týraly eskertpelerimiz bar, biraq ol memlekettik tildi meńgerýge bóget emes», - dedi Ǵarifolla Esim Ortalyq sailaý komissiiasynda ótken brifingte.
Ekinshi kezeńde úmitker lingvistikalyq komissiia aldynda 3 bettik mátindi oqýy kerek.
«Ekinshi kezeńde úmitker bilet arqyly Ábish Kekilbaidyń «Dala balladalaryn» tańdap aldy. Bul jerde de Sádibek Túgel óziniń oqý mádenietin kórsete aldy. Úshinshi kezeńde - sóz sóileý úshin úmitkerge «Babalar sózi - danalyq kózi» degen taqyryp tústi. Bul kezeńde kandidat qazaqsha erkin oilap, erkin sóilep, pikir aita alatynyn tolyq dáleldedi. Jalpy úsh kezeń boiynsha komissiia ujymy «Sádibek Túgel memlekettik tildi erkin meńgergen» degen sheshimge keldi», - dedi komissiia múshesi.
Aita keteiik, 22 sáýirde belgili qoǵam qairatkeri, jazýshy-jýrnalist Sádibek Túgel Qazaqstan Respýblikasynyń Prezidenttigine kandidat retinde qujat tapsyrdy. 23 sáýirde «Nur Otan» partiiasynyń atynan kandidat Qasym-Jomart Toqaev memlekettik til emtihanyn tapsyrǵan edi.
