«Amanat» azamattyq platformasy búgingi kezekten tys prezident sailaýynyń aralyq qorytyndysyn jariialady, dep habarlaidy Baq.kz agenttigi.
Platforma jetekshisi Murat Ábenovtiń aitýynsha, top atynan 10145 baqylaýshy sailaý ýchaskelerinde 1,5 ai boiy jumys istegen.
«Talai sailaýdy kórip kelemiz. Biylǵysy erekshe boldy. Azamattardyń saiasatqa qyzyǵýshylyǵy artqanyn baiqadyq. Syn kózben qaraityn adamdardy kóp kezdestirdik. Negizi biz zańbuzýshylyqtardy kózge shuqyp kórsetýden buryn, onyń sebepterin anyqtap, aldaǵy ýaqytta boldyrmaýdyń jolyn qarastyrdyq. Kemshilikter men zańbuzýshylyqtar boldy. Áli de jinaqtap, toptastyryp jatyrmyz. 18 kúrdeli zańbuzýshylyq anyqtadyq. Biýletenderdi toptap salýda 8 oqiǵa tirkeldi. Sondai-aq, 165 aýyzsha eskertý jasalyp, sol sátte joiyldy» - dedi ol.
Azamattyq platforma múshesi Shyńǵys Lepsibaev biýletenderdi toptap tastaý derekteri Shyǵys Qazaqstan, Mańǵystaý, Qyzylorda oblystary men Almaty, Nur-Sultan, Shymken qalalarynda oryn alǵanyn aitty.
Platformanyń taǵy bir múshesi Ákim Tursyn atalmysh zańbuzýshylyqtar der kezinde anyqtalyp, joly kesilgenin jetkizdi.
«Biz anyqtaǵan derekterdiń barlyǵynda biýletenderdiń toptap tastalýyna jol berilgen joq. Ol oqiǵalar boiynsha da akt toltyrylyp, quzyrly organdarǵa berildi. Eger zańsyzdyqtar dáleldense, ol adamdar zań aldynda jaýap beredi», - dedi Ákim Tursyn.
Azamattyq platforma ókilderi bul málimetterdiń barlyǵy aralyq qorytyndy ekenin atady. Jalpy sailaý kúnindegi jumystardyń tolyq qorytyndysy erteń jariialanbaq.
