9 maýsymda ótetin prezidenttik sailaýda alǵash ret daýys beretin elorda turǵyndary estelik syilyqtar alady, dep habarlaidy "Ult aqparat".
Nur-Sultan qalasy ákimdiginen málim etkendei, biyl 18 jasqa tolǵan 34 myńnan astam astanalyq QR Prezidenti sailaýynda alǵash ret daýys beredi. Olar úshin sailaý ýchaskelerinde syilyqtar daiyndalǵan. Sondai-aq 9 maýsym kúni týǵan kún merekelerin atap ótetin qala turǵyndary quralaqan qalmaidy. Olarǵa jeńil jeide, kepka, krýjka jáne basqa da kóptegen syilyqtar tapsyrylady.
«Sailaýǵa qatysýǵa qalalyqtardy barynsha tartý maqsatynda áleýmettik jelilerde «El júregi - Nur-Sultan!» atty arnaiy imidjdik joba iske qosyldy. 9 maýsymda elorda ákimdigi qoǵamdyq kólikterde tegin jol júrýdi qamtamasyz etetin bolady», - delingen ákimdik habarlamasynda.
Nur-Sultanda 18 jasqa tolǵan 34 366 azamat alǵash ret daýys beretini buǵan deiin habarlanǵan bolatyn. Qala ákiminiń orynbasary Erlan Qanalimovtiń aitýynsha, sailaýshylardyń tizimi bul kúnde naqtylanyp qoiǵan.
Elordada barlyǵy 239 sailaý ýchaskesi qurylǵan. Azamattar óz sailaý ýchaskesine qatysty málimetti «iKomek» qyzmetiniń «109» nómiri, «Smart Astana» mobildik qosymshasy, Telegram-daǵy @smartastana_bot chat-boty jáne ákimdik saityndaǵy silteme arqyly taba alady. Sailaýshylar tizimine qosylý úshin turǵylyqty mekenjai boiynsha turaqty nemese ýaqytsha tirkelý shart.
