Biyl elimizde aýyl ákimderiniń sailaýy ótetini belgili. Osy oraida sailanǵan aýyl ákimderiniń jeke jáne kásibi biliktiligin arttyrýǵa baǵyttalǵan arnaiy baǵdarlama ázirlendi. Bul týraly QR Prezidenti janyndaǵy Memlekettik basqarý akademiiasynyń rektory Erlan Ábil málim etti, dep habarlaidy QazAqparat.
«Aýyl ákimderin sailaý memlekettik damýdaǵy mańyzdy kezeńniń biri. Óitkeni, aýyl halqy basshyny ózi tańdaidy, olar eldimekenniń jaǵdaiy men ondaǵy máseleni sheshe alatyn azamattardy jaqsy biledi, osy oraida halyqqa tańdaý quqyǵy berilip otyr. Onyń ústine bul úrdis Qazaqstanda alǵash ret qolǵa alynyp otyr. Ekinshiden, ortalyqtandyrylǵan memlekettik basqarý júiesimen ǵana jumys istemei, sonymen qosa jergilikti atqarýshy organdardyń qyzmetine basymdyq beriledi. Ózderińiz biletindei, Memleket basshysy usynǵan «Halyq únine qulaq asatyn memleket» qaǵidaty bar, aýyl ákimderin sailaý sonyń jemisi desekte bolady. Iaǵni halyq ákimdi sailaý arqyly óz únin bilikke jetkizip otyr», - dedi Ábil.
Onyń aitýynsha, aýyl ákimderin sailaýdyń jaýapkershiligi zor jáne bastysy ol ashyq ári ádil ótýi tiis.
«Taǵy bir mańyzdy sát, aýyl ákimderin sailaýda jaýapkershilik Ortalyq sailaý komissiiasynyń emes jergilikti sailaý komissiiasynyń moinynda bolmaq. Ol degenimiz sailaýdyń ádil jáne ashyq túrde ótýi, onyń nátijesiniń halyqtyń kóńilinen shyqqany abzal. Sonymen qatar sailaýda jeńgen aýyl ákimi halyqpen tyǵyz qarym-qatynasta jumys istep, olardyń muń-muqtajyn sheshýge táýeldi bolady, sebebi halyq oǵan úmit artyp, óz daýsyn berdi. Jáne aýyl halqy da óz máselelerin sheshýde sailaǵan ákimmen birlesip qyzmet etýge nietti bolady. Jalpy ákim halyqqa jaqyn bolýy kerek. Sondai-aq kóshbasshylyq qasiettiń bolýy da mindetti jáne kez kelgen máselege qatysty ońtaily sheshim qabyldai alýy tiis», - deidi ol.
Odan bólek, akademiia basshysy aýyl ákimderine arnalǵan biliktilikti arttyrý baǵdarlamasynyń ázirlengenin aitty.
«Biz óz tarapymyzdan aýyl ákimderine eldi basqarýda qoldaý kórsetýge qashanda daiynbyz. Qazirgi ýaqytta Ulttyq ekonomika ministrligimen birlesip, sailanǵan aýyl ákimderin jeke jáne kásibi quzyrettilikke baýlityn arnaiy baǵdarlamanyń jobasyn ázirledik. Búginde ol kelisý ústinde, bekitilgen soń ákimge kerekti basty 2 quzyretti úiretetin bolamyz. Aldymen jeke bas quzyrettiligi. Ol degenimiz sóilesý, ózin-ózi ustaý jáne kóshbasshylyq qasiet. Ekinshi, kásibi quzyrettilik. Ákim bolǵannan soń ol memlekettik satyp alý, salyq saiasaty, biýdjet kodeksin jiti meńgerýi kerek, mine osy oraida biz oǵan óz bilimin jetildirýine kómektesetin bolamyz. Atalǵan baǵdarlamany meńgerý kýrsy 120 saǵattan turady. Jáne ony oflain nemese onlain túrde ótkizý qarastyrylyp otyr, ol eldegi karantindik ahýalǵa bailanysty bolady», - dedi rektor.
