Qazir bizdiń qoǵamda toqal alý máselesi jii qozǵalyp júr. Kóp áiel alýdy biri qoldasa, ekinshileri úzildi-kesildi qarsy. Tipti toqal alýdy zańdastyrý kerek degen pikirler de joq emes halyq arasynda. Tanymal ánshi Saiat Medeýov te kópshiliktiń, ásirese er adamdardyń kókeiinde júrgen osy bir máselege qatysty oiymen bólisti. Qazaq estradasynyń jaryq juldyzy toqal alýǵa qarsy emes eken, tipti kóp áiel alyp, úlken jaýapkershilik arqalaýdan qashpaityn jigitterdi qoldaý qajettigin aityp otyr. Bul týraly ánshi Astana telearnasynyń «Syrlasý» baǵdarlamasynda málimdedi, dep habarlaidy Ult.kz tilshisi.
Óziniń tek qyzdardyń ákesi ekenin aitqan ánshi, ul týyp bermegeni úshin jaryn jazǵyrmaitynyn aitty. Onyń aitýynsha, baqytty uldan kóresiń be, qyzdan kóresiń be — bul Allanyń enshisindegi dúnie.
Degenmen, ánshi toqal alý máselesine kelgende, ekinshi jar alǵan azamattardy qoldaý kerektigin aityp saldy. Onyń aitýynsha, onsyz da az qazaqtyń sanyn osylaisha arttyra túsken abzal.
«Balaǵa bola ekinshi ret úilený múmkin nárse. Ár adam ár nárseni jaqsy kóredi ǵoi. Mysaly men bolmaityn temir tulpardy jaqsy kóremin. Sol siiaqty bireý uldy, bireý qyzdy jaqsy kóredi. Oǵan kiná taǵýǵa da bolmaidy eshkimge. Sol úshin biz «Sen nege ul týmady dep ekinshi áiel aldyń» dep eshkimdi jazǵyra almaimyz. Onyń ekinshi áieli qyz týa ma, ul týa ma ony da bir Alla biledi», -dep jetkizdi ol perzentke bola toqal alý máselesine qatysty oiyn.
«Oǵan biz qarsy shyqpaýymyz kerek. Múmkin ol alǵan áielin baqytty etetin shyǵar, jaǵdaiyn jasap jatqan shyǵar. Nege biz toqal alyp jatqan adamdy jazǵyrýymyz kerek. Qoldaýymyz kerek. Óitkeni onsyz da qazaǵymyzdyń sany az. Onsyz da qyzdarymyz shetelge turmysqa shyǵyp ketip qalyp jatyr», — dedi ol.
