25 shilde kúni Qazaqstanda alǵash ret aýyl ákimderiniń tikelei sailaýy ótedi. Bul oqiǵa saiasi jańǵyrýdyń jańa kezeńin bildiredi. Bul týraly QR Prezidenti Qasym-Jomart Toqaev tvitterdegi paraqshasynda jazdy.
«25 shilde kúni Qazaqstanda alǵash ret aýyl ákimderiniń tikelei sailaýy ótedi. Bul oqiǵa saiasi jańǵyrýdyń jańa kezeńin bildiredi. Sailaýshylardy belsendi daýys berýge shaqyramyn. Halyqtyń múddesi úshin barlyq qajetti ózgeristerdi júzege asyrý kerek», - dep jazdy Toqaev.
Prezidenttiń baspasóz hatshysy Berik Ýáli sailaý naýqany barysynda azamattarymyz joǵary belsendilik tanytyp, turǵyndardyń memleket isi men qoǵam ómirine etene aralasatynyn jáne elimizdiń qazirgi damýy men keleshegine zor jaýapkershilikpen qaraitynyn kórsetkenin, muny Prezident "azamattyq patriotizmniń shyn mánindegi shynaiy kórinisi" dep ataǵanyn jazdy.
"Jergilikti atqarýshy organdardyń basshylary sanalatyn ákimder memlekettiń basty mindetteriniń biri – otandastarymyzdyń turmys sapasyn arttyrý máselesin sheshýde negizgi ról atqarýǵa tiis. Qasym-Jomart Toqaev aýyldar men aýdandyq mańyzy bar qalalardyń turǵyndaryn daýys berýge belsendi qatysýǵa shaqyrady. Memleket basshysy sailanǵan kandidattardyń bári ózi isiniń mamany bolatynyna jáne halyqtyń úmitin aqtai alatynyna senim bildiredi", - dep jazdy Ýáli Facebook paraqshasynda.
Aita keteiik, aýyl ákimderiniń tikelei sailaýyn ótkizý bastamasyn prezident Qasym-Jomart Toqaev 2020 jyldyń 1 qyrkúiektegi Joldaýynda usyndy.
Alǵash ret ótetin aýyl ákimderiniń sailaýyna qatysýǵa tirkelgenderdiń kópshiligi – ózin-ózi usynǵan azamattar. Olar jalpy kandidattardyń 61,8%-in qurap otyr.
Respýblika boiynsha sailaýǵa qatysý úshin barlyǵy 2 582 adam óz kandidatýrasyn usyndy, onyń 2 297-si nemese 88,9%-i qajetti tirkeýden ótti. 878 adam (38,2%) saiasi partiia atynan kandidat boldy.
Elimizdegi alty saiasi partiia aýyl ákimi bolýǵa óz kandidattaryn usyndy.
Tirkelgenderdiń jalpy sanynyń 61,8%-i nemese 1 419 adam ózin-ózi usyndy.
Aýdandyq mańyzy bar qala, aýyl, kent, aýyl okrýgi ákimi bolý úshin sailaýǵa 25 jastan asqan Qazaqstan azamaty qatysa alady. Sondai-aq memlekettik qyzmet salasyndaǵy zańnama talaptaryna sáikes kelýi, sottalmaǵan jáne sybailas jemqorlyqqa qatysty qylmys jasaý faktisi bolmaýǵa tiis.
25 shildede ótetin sailaýda Qazaqstan boiynsha 730 ákim sailanady. Taǵy 45 basshy jyl sońyna deiin sailanady, olardyń ókilet merzimi aiaqtalýy qajet.
