Parlament Májilisiniń jalpy otyrysynda palata depýtattary «Saiasi partiialar týraly» Qazaqstan Respýblikasynyń Zańyna ózgeris pen tolyqtyrýlar engizý týraly» zań jobasyn maquldady, dep habarlaidy QazAqparat.
«Saiasi partiialar týraly» Zańyna ózgeris pen tolyqtyrýlar engizý týraly» zań jobasy Prezidenttiń Ulttyq qoǵamdyq senim keńesiniń ekinshi otyrysynda bergen tapsyrmasyn iske asyrý maqsatynda ázirlendi. Zań jobasymen saiasi partiialardy qurý úshin tirkeý talabyn 40 myńnan 20 myń adamǵa deiin tómendetý usynylady.
Bul usynys saiasi partiialardy qurý tártibin jeńildetedi, sondai-aq memlekettik sheshimderdi ázirleý jáne qabyldaý protsesterine oń áserin tigizedi», - dedi Ádilet ministri Marat Beketaev.
Buǵan qosa, zań jobasymen partiialyq sailaý tizimderinde áielder men jastar úshin keminde otyz paiyz mólsherinde kvota engizý týraly túzetý bar. Bul Májiliste qaralǵan qaralǵan sailaý týraly Konstitýtsiialyq zań jobasynyń erejelerin iske asyrýǵa baǵyttalǵan.
«Usynylyp otyrǵan zań jobalar ár túrli alańdarda maqsatty toptarmen qaraldy. Atap aitqanda, zań jobalar Ulttyq qoǵamdyq senim keńesiniń jekelegen múshelerimen, jastarmen jáne saiasi partiialardyń ókilderimen keńinen talqylandy. Jalpy, osy zańnamalyq bastamalar áielder men jastardy qoǵamnyń saiasi ómirine belsene qatysýǵa, sondai-aq kóppartiialyq júieni odan ári qalyptastyrýǵa oń yqpalyn tigizetin bolady», - dedi ministr.
Óz kezeginde Májilis tóraǵasy Nurlan Nyǵmatýlin atalǵan zań jobasyna qatysty pikir bildirdi.
«Elimizdiń saiasi baǵytyn jańǵyrtý jolynda taǵy bir naqty qadam jasaldy deýge bolady. Búgingi maquldanǵan zań jobalaryna Memleket basshysy Qasym-Jomart Kemelulynyń tapsyrmasyna sáikes, kóptegen mańyzdy ózgerister engizildi. Endi, saiasi partiiany tirkeý úshin qajetti músheler sany 40 myńnan 20 myńǵa deiin qysqaratyn bolady. Sonymen birge, partiialardyń sailaý tiziminde endi áielder men jastar úshin 30 paiyz mindetti kvota qaralady. Osynyń barlyǵy elimizdiń saiasi-qoǵamdyq ómiri úshin mańyzdy ózgerister bolyp sanalady», - dedi Májilis tóraǵasy.
