QR Ádilet vitse-ministri Alma Muqanova Ortalyq kommýnikatsiialar qyzmetinde ótken brifingide oblys ákimderin saiasi partiiaǵa múshe bolýdan shekteý týraly pikir bildirdi, dep habarlaidy QazAqparat.
«Májilis depýtaty Azat Perýashev oblystaǵy ákimder de eshbir partiianyń quramynda bolmaý kerek degen usynys aityp júr. Sizdiń oiyńyzsha, bul qanshalyqty ádil», - dep surady jýrnalist.
Vitse-ministrdiń aitýynsha, bul másele áli talqylanýy kerek.
«Prezident Joldaýyna qarasaq, saiasat pen memlekettik qyzmet bir-birine tym jaqyn bolmaý kerektigi týraly aitylǵan. Ákimder boiynsha aitsaq, Joldaýda partiianyń laýazymdy tulaǵalary óz jumysyn ákimdik jumyspen birge júrgizbeýi kerek dep aitylǵan. Qazir biz pysyqtap jatqan zań jobada osyndai túzetýler qarastyrylyp jatyr. Biraq bizde partiia usynǵan, partiianyń múshesi bolyp tirkelgen ákimder bar. Partiialarmen osy másele boiynsha tiisti kezdesýler ótkizgen bolatynbyz. Máselen, qazirgi tańda ákimniń óz ornyn bosatýynyń bir negizi partiia quramynan shyǵý bolyp tabylady. Partiialardyń buǵan kózqarasyn bilip kórdik», - dedi Alma Muqanova.
Aitýynsha, partiialar ákimderdi óz qatarynan shyǵarýǵa qarsy.
«Olardyń ustanymy boiynsha ákim saiasi partiianyń baǵdarlamasyn paidalanyp shyqqan tulǵa bolyp esepteledi. Sondyqtan olar ákim partiia múshesi bolyp qala alýy kerek. Bul normany pysyqtap jatyrmyz. Óitkeni biz tek óz kózqarasymyzben ǵana sheshim qabyldai almaimyz. Saiasi partiialardyń pikirin osy normany pysyqtaý kezinde mindetti túrde eskeremiz», - dedi vitse-ministr.
