Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen Saiasi qýǵyn-súrgin qurbandaryn tolyq aqtaý jónindegi memlekettik komissiiasynyń úshinshi otyrysy ótti, dep habarlaidy "Ult aqparat" Aqordaǵa silteme jasap.
Komissiianyń otyrysynda Saiasi qýǵyn-súrgin qurbandaryn tolyq aqtaý jónindegi óńirlik komissiialardyń jumysyn uiymdastyrýǵa jáne olardyń mindetterine qatysty másele qarastyryldy.
Jiyn barysynda Bilim jáne ǵylym ministri Ashat Aimaǵambetov, Prezident Ákimshiliginiń Memlekettik baqylaý jáne aýmaqtyq-uiymdastyrý jumysy bóliminiń meńgerýshisi Qanatbek Jaisańbaev jáne birqatar oblys ákimderiniń orynbasarlary baiandama jasady.
Oblys ákimderiniń orynbasarlary – óńirlik komissiialardyń jetekshileri sarapshy ǵalymdarmen birge atqarylatyn jumystardy úilestirý, qýǵyn-súrginge ushyraǵan azamattardyń derekterin jinaý, jerleý oryndarynyń kartasyn jasaý, vedomstvolyq jáne memlekettik arhivterdiń qyzmetin qalyptastyrý máseleleri jóninde baiandady. Sondai-aq Memlekettik komissiianyń qyzmetin súiemeldeý jónindegi ádistemeni jergilikti jerlerge beiimdeý jumystaryna basa mán berildi.
Jiynda Memlekettik komissiia músheleri óńiraralyq yntymaqtastyq pen aimaqtyq komissiialardyń tájiribe almasý isin jetildirýge, arhiv qujattaryn saraptaý jónindegi oń tájiribelerdi ortaǵa salatyn alań qurýǵa, izdestirý-zertteý jumystaryn tiimdi qalyptastyrýǵa qatysty usynys-pikirlerin aitty.
Memlekettik komissiianyń tóraǵasy Qyrymbek Kósherbaev óz sózinde ǵalymdardyń zertteý jumystaryn júrgizýi úshin qolaily jaǵdai jasaý qajet ekenine basymdyq berdi. Sonymen qatar ǵalymdardyń eńbegin yntalandyrý jáne olardy jan-jaqty qoldaý kerek ekenin atap ótti.
Memlekettik hatshy elimizdegi tarihy bai jáne mádeni-rýhani murasy mol eldi mekenderde bolǵan oqiǵalardyń tizbegin zertteý jáne qalpyna keltirý jumystary barysynda sheteldik ozyq tájiribelerdi paidalanýdyń mańyzdylyǵyna toqtaldy. Budan bólek tarihi oqiǵalarǵa áleýmettik-demografiialyq turǵydan saraptama júrgizý óńirlik komissiialar jumysynyń mańyzdy bir bóligi bolmaq.
Májilis qorytyndysy boiynsha Nur-Sultan, Almaty, Shymkent qalalary men oblystardyń ákimderine óńirlik komissiialardyń qyzmetin jetildirýge, sarapshy ǵalymdarmen yqpaldastyqtyń tiimdiligin arttyrýǵa, zertteý jumystaryna halyqtyń belsendi bóligin jumyldyrýǵa qatysty tapsyrmalar berildi.
