QR Bilim jáne ǵylym ministri Ashat Aimaǵambetov saiasi qýǵyn-súrgin qurbandaryn tolyq aqtaý baǵytynda jumys isteitin ǵalymdar bekitilgenin aitty, dep habarlaidy QazAqparat.
«Bilim jáne ǵylym ministrligi osy memlekettik komissiiasynyń jumys organy retinde bekitildi. Sondyqtan aldymyzda turǵan eń basty máseleniń biri – ǵylymi áleýetimizdi, ǵalymdarymyzdy osy jumysqa tartý. Osy maqsatta akademikter, ǵylymi zertteý institýttarynyń jetekshi ǵalymdary, elimizdiń óńirlerinde ornalasqan joǵary oqý oryndarynyń qyzmetkerleri jumyldyrylyp otyr. Negizi, 11 baǵyt boiynsha jumys toptaryn uiymdastyrdyq. Bul 11 topta 57 ǵalym jumys istep jatyr», - dedi ministr Ortalyq kommýnikatsiialar qyzmetinde.
Onyń aitýynsha, atalǵan ǵalymdar birazdan beri osy problemamen ainalysyp kele jatyr.
«Ǵalymdar úshin tiisti jaǵdai jasap jatyrmyz. Ýniversitetterde isteitin ǵalymdar bógde jumystan bosatylyp, tek qana belgilengen mindetterge kirisip otyr. Aimaqtarda da jumys toptary, komissiialar quryldy. Bul komissiialarǵa oblys ákimderiniń orynbasarlary, depýtattar, ólketanýshylar, ǵalymdar, qoǵam belsendileri qatysyp jatyr», - dedi Aimaǵambetov.
Sonymen qatar ol bul jumystardyń aiasynda ádistemelik máselelerdi anyqtaý óte mańyzdy ekenin atap ótti.
«Sondyqtan ǵalymdarymyz arnaiy ádistemelik máselege toqtalyp, qaralatyn problemalardy anyqtap, tiisti jumystardy aiaqtady. Qajetti anyqtamalar men kitapshalar jasalyp, taratyldy. Eń bastysy, bul baǵyttaǵy qadamdar ǵylymi negizde, naqty muraǵattarǵa súiene otyryp jasalýy kerek. Ǵalymdarǵa muraǵattarda jumys isteý úshin ruqsatnama kerek boldy, osyǵan orai tiisti is-sharalar uiymdastyryldy», - dedi ministr.
