قر بٸلٸم جەنە عىلىم مينيسترٸ اسحات ايماعامبەتوۆ ساياسي قۋعىن-سٷرگٸن قۇرباندارىن تولىق اقتاۋ باعىتىندا جۇمىس ٸستەيتٸن عالىمدار بەكٸتٸلگەنٸن ايتتى, دەپ حابارلايدى قازاقپارات.
«بٸلٸم جەنە عىلىم مينيسترلٸگٸ وسى مەملەكەتتٸك كوميسسيياسىنىڭ جۇمىس ورگانى رەتٸندە بەكٸتٸلدٸ. سوندىقتان الدىمىزدا تۇرعان ەڭ باستى مەسەلەنٸڭ بٸرٸ – عىلىمي ەلەۋەتٸمٸزدٸ, عالىمدارىمىزدى وسى جۇمىسقا تارتۋ. وسى ماقساتتا اكادەميكتەر, عىلىمي زەرتتەۋ ينستيتۋتتارىنىڭ جەتەكشٸ عالىمدارى, ەلٸمٸزدٸڭ ٶڭٸرلەرٸندە ورنالاسقان جوعارى وقۋ ورىندارىنىڭ قىزمەتكەرلەرٸ جۇمىلدىرىلىپ وتىر. نەگٸزٸ, 11 باعىت بويىنشا جۇمىس توپتارىن ۇيىمداستىردىق. بۇل 11 توپتا 57 عالىم جۇمىس ٸستەپ جاتىر», - دەدٸ مينيستر ورتالىق كوممۋنيكاتسييالار قىزمەتٸندە.
ونىڭ ايتۋىنشا, اتالعان عالىمدار بٸرازدان بەرٸ وسى پروبلەمامەن اينالىسىپ كەلە جاتىر.
«عالىمدار ٷشٸن تيٸستٸ جاعداي جاساپ جاتىرمىز. ۋنيۆەرسيتەتتەردە ٸستەيتٸن عالىمدار بٶگدە جۇمىستان بوساتىلىپ, تەك قانا بەلگٸلەنگەن مٸندەتتەرگە كٸرٸسٸپ وتىر. ايماقتاردا دا جۇمىس توپتارى, كوميسسييالار قۇرىلدى. بۇل كوميسسييالارعا وبلىس ەكٸمدەرٸنٸڭ ورىنباسارلارى, دەپۋتاتتار, ٶلكەتانۋشىلار, عالىمدار, قوعام بەلسەندٸلەرٸ قاتىسىپ جاتىر», - دەدٸ ايماعامبەتوۆ.
سونىمەن قاتار ول بۇل جۇمىستاردىڭ اياسىندا ەدٸستەمەلٸك مەسەلەلەردٸ انىقتاۋ ٶتە ماڭىزدى ەكەنٸن اتاپ ٶتتٸ.
«سوندىقتان عالىمدارىمىز ارنايى ەدٸستەمەلٸك مەسەلەگە توقتالىپ, قارالاتىن پروبلەمالاردى انىقتاپ, تيٸستٸ جۇمىستاردى اياقتادى. قاجەتتٸ انىقتامالار مەن كٸتاپشالار جاسالىپ, تاراتىلدى. ەڭ باستىسى, بۇل باعىتتاعى قادامدار عىلىمي نەگٸزدە, ناقتى مۇراعاتتارعا سٷيەنە وتىرىپ جاسالۋى كەرەك. عالىمدارعا مۇراعاتتاردا جۇمىس ٸستەۋ ٷشٸن رۇقساتناما كەرەك بولدى, وسىعان وراي تيٸستٸ ٸس-شارالار ۇيىمداستىرىلدى», - دەدٸ مينيستر.
