Qyrǵyzstan prezidenti Sadyr Japarovtyń sapary Qazaqstanmen strategiialyq áriptestik pen odaqtastyqty nyǵaitýǵa baǵyttalǵan. Qazaqstan strategiialyq zertteýler institýty direktorynyń orynbasary Sanat Kóshkimbaev osylai deidi.
«Kóktemniń basy Qazaqstan astanasynyń saiasi kúntizbesindegi mańyzdy oqiǵamen tuspa-tus keldi. 2021 jylǵy 2-3 naýryzda Qazaqstan prezidenti Qasym-Jomart Toqaevtyń shaqyrýymen Qyrǵyzstan basshysy Sadyr Japarovtyń Qazaqstanǵa alǵashqy memlekettik sapary ótýde. Qazaqstan Prezidenti birinshi bolyp Sadyr Japarovty Qyrǵyzstan basshysy laýazymyna sailanýymen quttyqtap, elimizge memlekettik saparmen kelýge shaqyrdy. Qyrǵyz prezidentiniń Ortalyq Aziia elderiniń ishinde alǵashqy saparynyń Qazaqstannan bastalýy Bishkek úshin Nur-Sultanmen strategiialyq áriptestik pen odaqtastyq qatynastardy nyǵaitýdyń mańyzdylyǵyn bildiredi. Sapar aiasynda nátijeli ekijaqty kelissózder júrgizildi. Qazaqstannyń Qyrǵyzstanmen jan-jaqty yntymaqtastyǵy buǵan deiin qol qoiylǵan 180 qujat, onyń ishinde 1997 jylǵy Máńgilik dostyq týraly shart jáne 2003 jylǵy odaqtastyq qatynastar týraly shart negizinde damýda» dep atap ótti Sanat Kóshkimbaev.
Onyń aitýynsha, Qazaqstan Qyrǵyzstannyń turaqtylyǵy men órkendeýine, baýyrlas memleketpen syndarly dialog pen kópjosparly yntymaqtastyqty jalǵastyrýǵa óte múddeli.
Shyn máninde, qyrǵyz kóshbasshysy atap ótkendei, bizdiń elderimizdiń ekijaqty kún tártibinde sheshilmeitin máseleler joq.
Qazaqstan Qyrǵyzstannyń (Qytai jáne Reseimen qatar) negizgi saýda-ekonomikalyq jáne investitsiialyq seriktesteriniń biri bolyp qala beredi. 2020 jyldyń qorytyndysy boiynsha eki el arasyndaǵy taýar ainalymy 800 mln qurady.
2019 jylmen salystyrǵanda, koronakriziske bailanysty (856 mln) saýda ainalymynyń birshama tómendeýi oryn aldy.
Eki el saýda-ekonomikalyq kooperatsiiany qalpyna keltirip, ulǵaitqysy keletini anyq.
«Qazaqstannyń Qyrǵyzstanǵa eksportynyń negizgi bóligi metall buiymdary, tas kómir, ósimdik ónimderi, turmystyq tehnika, un, astyq jáne konditerlik ónimder bolyp tabylady. Qazaqstan Qyrǵyz Respýblikasynan negizinen aýyl sharýashylyǵy ónimderin, toqyma ónimderin, kendi, qyzdyrý shamdaryn, jemister men kókónisterdi importtaidy. Qazirgi ýaqytta qyrǵyz tarapy qazaqstandyq elektr energiiasynyń importy týraly máseleni qarastyrýda. Bizdiń elimiz kórshi elge 1 mlrd mkVt-qa deiin elektr energiiasyn eksporttaýǵa daiyn. Elimizdiń investitsiialyq belsendiligi týraly eske salǵan jón. Qazaqstan 2005 jyldan bastap Qyrǵyzstanǵa jalpy shamamen 1 mlrd. dollar investitsiialady, atap aitqanda, taý-ken jáne kommýnikatsiia salasyna eleýli salymdar salyndy» deidi Qazaqstan strategiialyq zertteýler institýty direktorynyń orynbasary.
Sanat Kóshkimbaevtyń sózine sensek, Qazaqstan men Qyrǵyzstan óńirlik jáne halyqaralyq kún tártibindegi negizgi máseleler boiynsha ortaq múddeler men uqsas ustanymdardy biriktiredi.
Eki memleket te Eýraziialyq ekonomikalyq odaqqa, ShYU-ǵa múshe, AÓSShK protsesiniń jáne osy jyly Qyrǵyzstanda rotatsiia quqyǵy boiynsha ótýi tiis Ortalyq Aziia memleketteri basshylarynyń Turaqty konsýltativtik kezdesýleriniń belsendi qatysýshylary bolyp tabylady.
Sonymen qatar, qazirgi jaǵdaida Qazaqstan men Qyrǵyzstannyń koronavirýstyq pandemiiamen kúrestegi ózara is-qimylyn nyǵaitý asa mańyzdy.
«Esterińizge sala keteiin, 2020 jyldyń sáýir aiynda Qazaqstan Prezidenti Q.K. Toqaev Ortalyq Aziia memleketterine «muqtaj elderdiń úkimetteri járdem suraǵan jaǵdaida» gýmanitarlyq kómek kórsetýge daiyn ekenin málimdedi. COVID-19 qarsy is-qimyldaǵy gýmanitarlyq kómek sheńberinde Qazaqstan 2020 jyly Qyrǵyzstanǵa azyq-túlik qaýipsizdigin qamtamasyz etý maqsatynda 5 myń tonna un, 16 tonna meditsinalyq júk, onyń ishinde ókpeni jasandy jeldetýdiń 400 mobildik apparattarynyń jiyntyǵy jáne jalpy quny 389 mln teńge bolatyn Qazaqstanda jasalynǵan 2 mln meditsinalyq maskasyn jiberdi. Qyrǵyz kóshbasshysy Sadyr Japarovtyń el Prezidenti retindegi QR-ǵa alǵashqy memlekettik sapary - Qyrǵyzstannyń Qazaqstanmen ózara tiimdi yntymaqtastyq pen strategiialyq seriktestikti nyǵaitýǵa beiildiliginiń kórsetkishi. Jemisti sapardyń qorytyndysy boiynsha qol jetkizilgen ekijaqty ýaǵdalastyqtar baýyrlas memleketterdiń saýda-ekonomikalyq saladaǵy, óńirlik qaýipsizdik pen turaqtylyqty nyǵaitý salasyndaǵy ózara tiimdi yntymaqtastyǵyna jańa serpin beretini sózsiz» dep túiindedi Sanat Kóshkimbaev.
