Jańadan qurylǵan QR Ǵylym jáne joǵary bilim ministrliginde tsifrlandyrý jónindegi vitse-ministr laýazymyn ashý qarastyrylyp otyr. Bul týraly atalǵan vedomstvo basshysy Saiasat Nurbektiń QR Tsifrlyq damý, innovatsiialar jáne aeroǵarysh ónerkásibi ministrliginiń elektrondy qyzmet jumysymen tanysý barysynda belgili boldy, dep habarlaidy QazAqparat.
«Bizdiń aldymyzda ǵylymdy tanytý mindeti tur. Mundaǵy eń basty baǵyttardyń biri – ministrliktiń barlyq ishki protsesterin tsifrlandyrý. Bul syn-pikirlerge birden jaýap berýge jáne ǵylym men joǵary oqý oryndaryna bólinetin qarjynyń ashyqtyǵyn qamtamasyz etýge múmkindik beredi», - dedi Saiasat Nurbek.
Aldaǵy jumystardyń mańyzdylyǵyn eskere otyryp, jańadan qurylǵan Ǵylym jáne joǵary bilim ministrliginde tsifrlandyrý jónindegi vitse-ministr laýazymyn ashý qarastyrylyp otyr.
«Ol ishki protsesterdi tsifrlandyrý jumysyn qadaǵalap, tiisti ministrliktermen jáne vedomstvolarmen ózara qarym-qatynas isine jaýap beretin bolady. Mysalǵa, bólingen qarjyny aldyn ala taldaý nátijesi kórsetkendei, tsifrlyq platformany uiymdastyrý ǵylymi-zertteý institýttarynda qoldanysta bar barlyq zerthana jabdyqtaryn esepke alýǵa kómektesedi. Bul jańa jabdyqtardy satyp alý isin jyldamdatady jáne jumys istep turǵan zerthanalardy birlese paidalanýdy qamtamasyz etedi», - delingen ministrlik habarlamasynda.
Eske salaiyq, Ulttyq ǵylym akademiiasynda ǵalymdarmen kezdesý barysynda Memleket basshysy Qasym-Jomart Toqaev elimizdiń ǵylym salasyn basqarý júiesin jetildirý qajettigin atap ótken bolatyn.
