Taldyqorǵan qalalyq politsiia basqarmasynyń kezekshi bólimine oblys ortalyǵynyń 20 jastaǵy turǵynynan aryz tústi. Habarlamada belgisiz bireýler qaladaǵy saiabaqtardyń birinde aqsha urlaǵany aitylǵan.
Almaty oblysy politsiia departamenti taratqan aqparatqa súiensek, oqiǵa 1 tamyz kúni Ortalyq saiabaq aýmaǵynda bolǵan.
«Jedel-izdestirý is-sharalary barysynda saiabaq aýmaǵynda belgisiz azamat aqsha men ámiian urlaǵany belgili boldy. Tártip saqshylary Taldyqorǵan qalasy jedel izdestirý basqarmasynyń beinebaqylaý kameralary kómegimen kúdikti adamdy anyqtady», – dedi Taldyqorǵan qalalyq politsiia basqarmasynyń basshysy, politsiia polkovnigi Asqar Nursapa.
Tártip saqshylary qylmys týraly múmkindiginshe tezirek habarlaýǵa keńes beredi. Árbir joǵalǵan minýt qylmyskerdiń iz jasyrý múmkindigin arttyrady.
«Politsiia qyzmetkerleri izdestirý sharalary barysynda kúdiktiniń jeke basyn anyqtap, tutqynǵa aldy. Kúdikti Kóksý aýdanynyń 28 jastaǵy turǵyny bolyp shyqty, ol bultartpas dálelder keltirgennen keiin kinásin moiyndady. Oǵan qatysty QR QK 187-baby 1-tarmaǵy boiynsha qylmystyq is qozǵaldy», – dedi polkovnik Asqar Nursapa.
Eske sala ketsek, Almaty oblysynda ótken jyldyń qazan jáne qarasha ailarynda urlyq derekterine qatysty, atap aitqanda jeke úilerden ózgeniń múlkin qoldy qylýdyń 12 deregi tirkelgen bolatyn. Onyń alty deregi Taldyqorǵan qalasynda, beseýi Sarqan jáne bireýi Kóksý aýdandarynda jasalǵan. Seriialy urlyq tizbesine qatysy bar kúdiktilerdi anyqtaý maqsatynda bilikti politseilerden izdeý toby qurylyp, urlyqtardy jasaýǵa qatysy bar qylmystyq toptyń jymysqy áreketi áshkerelendi.
