Parlament Májilisiniń jalpy otyrysynda bir top depýtat elimizdiń aýmaǵynda mal urlyǵyna tosqaýyl qoiý máselesin kóterdi. Osy oraida Úkimet basshysy Asqar Maminniń atyna depýtattyq saýal joldandy, dep habarlaidy QazAqparat tilshisi.
«Aldymen máseleniń zatynan buryn atyn anyqtap alaiyq. Bizdiń depýtattyq saýalymyzǵa arqaý bolyp otyrǵan másele - mal urlyǵy. Barymtashylyq emes. Buqaralyq aqparat quraldarynda, keide tipti qylmystyq hronikada «Barymtashylar basynyp barady» nemese «Barymtashylar buǵalyqtaldy» degen siiaqty dybys úndestigine qurylǵan sóz tirkesteri qoldanylyp jatatyny bar. Qate aitylǵan sóz. Barymta - tarihi uǵym. Baiyrǵy qazaq qoǵamyndaǵy qun daýyna, jesir daýyna, jer daýyna, basqa da daýly máselelerge bailanysty biler kesken qun mólsherin aiypty jaq ótei almaǵanda, qun daýlaýshylardyń qarsy jaqtan óristegi jylqylardy shaýyp, aidap áketýin barymta degen. Keide barymtanyń ádilettilikti qalpyna keltirýge septesken jailary da kezdesken. Sondyqtan aǵaiynnyń aqysyn jibermei, tiisti qundy amalsyzdan osyndai jolmen qaitaratyn namysty, qarýly jigitterdi barymtashy dep dáriptep qoiatyny da bolǵan. Al aidyń, kúnniń amanynda aidaladaǵy maldy aidap alatyndardy, tún jamylyp bógde qoraǵa baratyndardy, jazyqsyz jandardyń obalyna qalatyndardy basqasha aitqan. Olardy baýkespe degen, ury degen, qaraqshy degen», - dep túsindirdi S. Abdrahmanov.
Osy oraida depýtat aýyl turǵyndary, «Qazaqstan fermerleri odaǵy» talai jyldan beri dál osy mal urylary jónindegi máseleni qaita-qaita kóterip jatqanyn eske saldy.
«Alaida, Ishki ister ministrligi tarapynan qylmyskerlerdiń, sonyń ishinde uiymdasqan qylmysty toptar quramynda áreket etetinderdiń mal urlaýyn anyqtaýynda, ustaýynda ilgerileý baiqalmaidy. Olar maldy urlaýdan, tasyp áketýden, soiýdan, etti bazarǵa shyǵarýdan qurylatyn qylmystyq ister tizbegin emin-erkin jalǵastyryp jatyr. Politsiia qyzmetiniń osy qylmys túrimen kúresinde júielilik, talapshyldyq, jedeldik jáne jurtshylyqpen bailanys jetispeidi», - dedi ol.
Bas prokýratýranyń málimetteri boiynsha, sońǵy eki jyldyń ishinde elimizde bul qylmys túriniń 12 myń oqiǵasy tirkelgen. Basqasha aitqanda, Qazaqstanda búginde kún saiyn mal urlaýdyń 16 oqiǵasy oryn alady. Shekten shyqqan jailar da kezdesedi. Endi urylar maldy úiirlep áketýge kirisken. Mundai mysaldardy barlyq oblystardan keltire berýge bolady.
«Qurmetti Asqar Uzaqbaiuly! Osy problemaǵa bailanysty Sizden memlekettik qurylymdarǵa tiisti tapsyrmalar berýińizdi suraimyz. Birinshiden, mal urlyǵymen kúresti kúsheitý jóninde maqsatty jumys júrgizý, bul iske barlyq deńgeidegi ákimdikterdiń kúshin, Ishki ister ministrliginiń aýdandyq, oblystyq jáne respýblikalyq qurylymdarynyń barsha áleýetin, tehnikalyq múmkindikterin jumyldyrý qajet. Ekinshiden, Ishki ister ministrligi Aýyl sharýashylyǵy ministrliginiń veterinariialyq inspektsiiasymen birlese otyryp, bazarlarǵa, qoǵamdyq tamaqtandyrý oryndaryna, sonyń ishinde áskeri bólimsheler men meditsina mekemelerine túsetin ettiń qaidan, qalai keletinin anyqtaýdyń dálme-dál tártibin aiqyndaýǵa tiis», - dedi Saýytbek Abdrahmanov.
Munymen qosa, oblystyq ákimdikter jergilikti politsiianyń aýyldyq jerdegi qurylymdaryn tehnikalyq jáne kadrlyq turǵydan kúsheitý jóninde naqty qadamdar jasaýy kerektigi aityldy. Aýyl ákimderi mal urlaýdy, soiylǵan etti satýdy kásip etetinderdi anyqtaýǵa bar kúshti jumsaǵany jón.
«Kimniń ne istep júrgenin aýyldaǵylar bilmeidi emes, biledi. Olar ne mal urylaryn áshkereleýden qorqady, ne jalǵan aǵaiynshyldyqtan asa almaidy», - dedi depýtat.
