QR Premer-Ministri Asqar Maminniń tóraǵalyǵymen ótken Úkimet otyrysynda Saýdany damytýdyń 2021-2025 jyldarǵa arnalǵan memlekettik baǵdarlamasy tujyrymdamasynyń jobasy qaraldy, dep habarlaidy "Ult aqparat" primeminister.kz saityna silteme jasap.
Tujyrymdamamen saýda jáne integratsiia ministri B. Sultanov tanystyrdy, Dúniejúzilik banktiń ókili Sh. Rahardja men Premer-Ministrdiń Birinshi orynbasary – qarjy ministri Á. Smaiylov QR-da saýdany damytýǵa qatysty máseleniń ózektiligi men tásilderi týraly baiandama jasady.
Saýda Qazaqstannyń JIÓ-niń 17%-yn quraidy. 2019 jyldyń qorytyndysy boiynsha salanyń ósý qarqyny 7,6%-dy qurady, al jumyspen qamtylǵan qyzmetkerlerdiń sany 1,4 mln adamǵa jetti. Qazaqstannyń syrtqy saýda ainalymy – $96,1 mlrd, onyń ishinde eksport – $57,7 mlrd jáne import $38,4 mlrd qurady. Ishki taýar ainalymy 37,5 trln teńgeden asty, bul 2018 jylmen salystyrǵanda 11%-ǵa artyq.
Ázirlenip jatqan memlekettik baǵdarlamanyń maqsaty — naryqty sapaly ónimmen molyqtyrýdy jáne eksporttyq taýarlar men qyzmetterdiń básekege qabilettiligin qamtamasyz etetin zamanaýi saýda júiesin qurý jáne damytý.
Negizgi mindetter retinde ónimniń sapasy men qaýipsizdigin arttyrý, saýda salasynda sapaly adami kapitaldy qalyptastyrý, ońtailandyrylǵan tsifrlyq saýda protsesin qamtamasyz etý, kóp formatty saýda-taratý infraqurylymyn, qolaily tutyný ortasyn qurý, shikizattyq emes taýarlar men qyzmetterdiń importy men eksportyn ártaraptandyrý, ishki jáne syrtqy naryqtarda otandyq taýar óndirýshiler úshin qolaily jaǵdailar jasaý anyqtaldy.
Aldyn ala baǵalaý boiynsha, Memlekettik baǵdarlamany júzege asyrýǵa jeke investitsiialardy qosa alǵanda shamamen 285 mlrd teńge qajet. Josparlanǵan mindetterdi oryndaý 2025 jylǵa qarai saýdanyń ortasha jyldyq jalpy qosylǵan qunyn 106,2%-ǵa arttyrýǵa, ulttyq standarttardy qoldaný deńgeiin 41%-dan 75%-ǵa deiin arttyrýǵa, taýarlar men qyzmetterdiń shikizattyq emes eksportyn $41 mlrd-qa deiin ulǵaitýǵa, bólshek taýar ainalymynan elektrondy saýda úlesin 10%-ǵa deiin arttyrýǵa múmkindik beredi.
Memlekettik baǵdarlamada taýar ótkizý júiesin qalyptastyrý, birjalyq, shekara mańy jáne elektrondyq saýdany damytý, tehnikalyq retteý jáne tutynýshylardyń quqyqtaryn qorǵaý quraldaryn jetildirý sharalary qarastyrylatyn bolady.
Úkimet basshysy Saýda jáne integratsiia ministrligine osy jyldyń 1 shildesine deiin Memlekettik baǵdarlamanyń jobasyn Úkimetke engizýdi qamtamasyz etýdi, ortalyq jáne jergilikti atqarýshy organdarǵa – qujatty ázirleýge belsene qatysýdy tapsyrdy.
«Qujatta qolaily tutyný ortasyn qurýǵa, halyqty sapaly jáne qaýipsiz taýarlarmen qamtamasyz etýge, sondai-aq qazaqstandyq taýarlar men qyzmetterdiń syrtqy naryqtarda básekege qabilettiligin arttyrýǵa baǵyttalǵan baǵdar ornatylýy tiis. Sondai-aq halyqaralyq yntymaqtastyq aiasynda ulttyq múddelerdi qorǵaý jáne ilgeriletý ázirlenip jatqan baǵdarlamanyń basty maqsattarynyń biri bolýy tiis», — dedi A. Mamin.
.jpeg)