Reseidiń Kemerovo qalasynda "Zimniaia vishnia" oiyn-saýyq ortalyǵyndaǵy órttiń saldarynan 64 adam qaza tapty, dep habarlaidy "Ult aqparat".
Reseidiń Kemerov qalasyndaǵy "Zimniaia vishnia" saýda ortalyǵynda 25 naýryz kúni bolǵan órtten qurban bolǵandar sany sońǵy derekter boiynsha 64 adamǵa, jaralanǵandar sany 45 adamǵa jetti. Tótenshe jaǵdaidy joiý boiynsha jedel shtabta taǵy 16 adamnyń izdestirilip jatqany habarlandy. «Olar tórtinshi qabattan úshinshi qabatqa opyrylyp túsken kinozalda bolýy múmkin», - dep túsindirdi agenttiktiń derekkózi.
Qyzyl jalyn sóndirilgenine qaramastan, órt sóndirýshiler jumysyn jalǵastyryp jatyr. Óitkeni ǵimarattyń ózge de bólekteri qulaýy múmkin.
"Qazirgi tańda órtti sóndirý jumystary jalǵasyp jatyr, qabataralyq jabyndar otyryp qaldy, soǵan bailanysty onyń opyrylyp qulaý qaýpi týyndap otyr", — dedi TJM basshysynyń orynbasary Vladlen Aksenov.
Órt bolǵan jerde 663 adam men 123 tehnika jumys istep jatyr.
Tótenshe jaǵdailar ministrliginiń málimetinshe, saýda ortalyǵynyń kinoteatr men balalardyń oiyn alańdary ornalasqan tórtinshi qabatynda órttiń neden tutanǵany ázirshe belgisiz. Órt shyqqan kezde ǵimaratta bolǵan 200-ge jýyq adam syrtqa shyǵarylǵan.
Kei kýágerlerdiń aitýynsha, órt shyqqan kezde dabyl berý júiesi jumys istemegen. Tergeý komiteti órtten adamdardyń mert bolýyna bailanysty qylmystyq is qozǵady. Kemerov oblystyq prokýratýrasy da órt oqiǵasyn tekserýdi bastaǵan.
