Saýda jáne integratsiia ministri Baqyt Sultanov 2025 jylǵa deiin jyl saiyn eksportqa baǵyttalǵan 100 kompaniia daiyndalatynyn málim etti, dep habarlaidy QazAqparat.
«Ókinishke qarai bizdiń elde turaqty eksporterlardyń sany tym az. Jalpy kompaniialardyń 2 paiyzy ǵana (445 sýbekt) shetelge ónimin shyǵarýda. Áitse de osy eksporterlardyń 81 paiyzynyń shaǵyn jáne orta biznes ókili ekeni qýantady. Olardyń úlesi jyl sanap artyp keledi», - dedi Baqyt Sultanov OKQ-da ótken baspasóz máslihatynda.
Qazaqstandyq eksporter-kompaniialardyń kóbi Almaty, Nur-Sultan men Shymkent qalalarynda shoǵyrlanǵan. Prezident qyrkúiek aiyndaǵy Joldaýynda jańa eksporttaýshylarǵa qol kórsetý qajettiligine basa nazar aýdarǵan edi. Ol shikizattyq emes óndirýshiler úshin eksportty jedeldetý baǵdarlamasyn iske qosýdy tapsyrdy. Sondyqtan, Baqyt Sultanov Qazaqstannń halyqaralyq seriktesi PricewaterhouseCoopers-pen birge tyń baǵdarlama iske qosylǵanyn málim etti.
«Biyl biz maqsatty naryq retinde Qytaidy tańdadyq. Qajettilikter turǵysynan bul eń kúrdeli, biraq sonymen birge múmkindikter turǵysynan orasan zor naryq. Akseleratorǵa qatysý úshin niet bildirgen 500 kompaniianyń ishinen Qytaiǵa ónimin eksporttaýǵa baǵyttalǵan 35 tamaq ónerkásibi kásiporny tańdaldy. Osy jyldyń qarasha aiyna deiin bul kompaniialar biliktilikti arttyrý kýrstarynan ótip, qajetti eksporttyq quzyrettilikterge ie bolady. Akseleratorǵa qatysýshy kompanimialar óz ónimderin Shanhaidaǵy 3-shi Halyqaralyq importtyq taýarlar men qyzmetter kórmesinde usynady», - deidi ol.
Baqyt Sultanov endigi mindeti – 2025 jylǵa deiin turaqty eksporter-kompaniialardyń sanyn 100-ge arttyryp, olardyń sanyn 1000-ǵa jetkizý kózdelip otyrǵanyn aitty.
