ساۋدا جەنە ينتەگراتسييا مينيسترٸ باقىت سۇلتانوۆ 2025 جىلعا دەيٸن جىل سايىن ەكسپورتقا باعىتتالعان 100 كومپانييا دايىندالاتىنىن مەلٸم ەتتٸ, دەپ حابارلايدى قازاقپارات.
«ٶكٸنٸشكە قاراي بٸزدٸڭ ەلدە تۇراقتى ەكسپورتەرلاردىڭ سانى تىم از. جالپى كومپانييالاردىڭ 2 پايىزى عانا (445 سۋبەكت) شەتەلگە ٶنٸمٸن شىعارۋدا. ەيتسە دە وسى ەكسپورتەرلاردىڭ 81 پايىزىنىڭ شاعىن جەنە ورتا بيزنەس ٶكٸلٸ ەكەنٸ قۋانتادى. ولاردىڭ ٷلەسٸ جىل ساناپ ارتىپ كەلەدٸ», - دەدٸ باقىت سۇلتانوۆ وكق-دا ٶتكەن باسپاسٶز مەسليحاتىندا.
قازاقستاندىق ەكسپورتەر-كومپانييالاردىڭ كٶبٸ الماتى, نۇر-سۇلتان مەن شىمكەنت قالالارىندا شوعىرلانعان. پرەزيدەنت قىركٷيەك ايىنداعى جولداۋىندا جاڭا ەكسپورتتاۋشىلارعا قول كٶرسەتۋ قاجەتتٸلٸگٸنە باسا نازار اۋدارعان ەدٸ. ول شيكٸزاتتىق ەمەس ٶندٸرۋشٸلەر ٷشٸن ەكسپورتتى جەدەلدەتۋ باعدارلاماسىن ٸسكە قوسۋدى تاپسىردى. سوندىقتان, باقىت سۇلتانوۆ قازاقستاننڭ حالىقارالىق سەرٸكتەسٸ PricewaterhouseCoopers-پەن بٸرگە تىڭ باعدارلاما ٸسكە قوسىلعانىن مەلٸم ەتتٸ.
«بيىل بٸز ماقساتتى نارىق رەتٸندە قىتايدى تاڭدادىق. قاجەتتٸلٸكتەر تۇرعىسىنان بۇل ەڭ كٷردەلٸ, بٸراق سونىمەن بٸرگە مٷمكٸندٸكتەر تۇرعىسىنان وراسان زور نارىق. اكسەلەراتورعا قاتىسۋ ٷشٸن نيەت بٸلدٸرگەن 500 كومپانييانىڭ ٸشٸنەن قىتايعا ٶنٸمٸن ەكسپورتتاۋعا باعىتتالعان 35 تاماق ٶنەركەسٸبٸ كەسٸپورنى تاڭدالدى. وسى جىلدىڭ قاراشا ايىنا دەيٸن بۇل كومپانييالار بٸلٸكتٸلٸكتٸ ارتتىرۋ كۋرستارىنان ٶتٸپ, قاجەتتٸ ەكسپورتتىق قۇزىرەتتٸلٸكتەرگە يە بولادى. اكسەلەراتورعا قاتىسۋشى كومپانيميالار ٶز ٶنٸمدەرٸن شانحايداعى 3-شٸ حالىقارالىق يمپورتتىق تاۋارلار مەن قىزمەتتەر كٶرمەسٸندە ۇسىنادى», - دەيدٸ ول.
باقىت سۇلتانوۆ ەندٸگٸ مٸندەتٸ – 2025 جىلعا دەيٸن تۇراقتى ەكسپورتەر-كومپانييالاردىڭ سانىن 100-گە ارتتىرىپ, ولاردىڭ سانىن 1000-عا جەتكٸزۋ كٶزدەلٸپ وتىرعانىن ايتتى.
