Búgin Saýda jáne integratsiia ministri Baqyt Sultanov pen «Atameken» UKP tóraǵasy Abylai Myrzahmetov ózara túsinistik jáne yntymaqtastyq týraly memorandýmǵa qol qoidy, dep habarlaidy QazAqparat tilshisi.
Saýda jáne integratsiia ministrliginiń alqa otyrysy aiasynda rásimdelgen qujatta ishki jáne syrtqy saýdany damytý, otandyq óndirýshilerdiń ónimderin ilgeriletý men shikizattyq emes eksportty ótkizý naryqtaryn keńeitý, Eýraziialyq ekonomikalyq odaq, Dúniejúzilik saýda uiymy jáne úshinshi eldermen saýda jasaý sheginde ózara is-qimyldy nyǵaitý kózdelgen.
Memorandýmda statistikalyq derekterdi qosa alǵanda saýda qyzmeti máseleleri boiynsha aqparat almasý, Qazaqstanǵa qatysty DSU men EAEO músheleriniń buzýshylyq faktileri, syrtqy naryqta otandyq kásipkerlerge kedergiler men shekteýler týraly aqparatpen almasý qarastyrylǵan.
«Bul qujat otandyq biznes múddesinde saýdany damytý boiynsha uzaq merzimdi yntymaqtastyq pen ózara jemisti jumys isteýdiń negizi bolatynyna senimdimiz», - dedi «Atameken» UKP Abylai Myrzahmetov.
