Qazaqstanda saýda jelileri áleýmettik mańyzy bar azyq-túlik taýarlaryn jetkizýshilerden syiaqy óndirip ala almaidy. Bul jaiynda búgin QR Saýda jáne integratsiia vitse-ministri Azamat Asqaruly aitty, dep habarlaidy QazAqparat.
Minstrlik ishki saýdany damytý máseleleriniń júieli jáne naqty tásilderine mán beretin bolady. Birinshiden, áleýmettik mańyzy bar azyq-túlik taýarlaryna baǵany tejeý jáne olardyń ósý sebepterin kezeń-kezeńimen joiý maqsatynda ministrlik Aýyl sharýashylyǵy ministrligimen jáne jergilikti atqarýshy organdarmen birlese otyryp, aýqymdy jumys júrgizýde.
Osy jyldyń 2 sáýirinde «Biznes ortany damytý jáne saýda qyzmetin retteý týraly» zań qabyldandy. Ol baǵany turaqtandyrý men tejeýdiń jańa sharttaryn qarastyrady», - dedi vitse-ministr vedomstvonyń Memleket basshysynyń taiaýdaǵy Joldaýynyń negizgi baǵyttaryn túsindirýge arnalǵan alqa otyrysynda.
Ekinshi, onyń atap ótýinshe, osy jyldyń 16 tamyzynan bastap ishki saýda qaǵidalaryna engizilgen ózgerister otandyq óndirýshiler úshin óz taýlarlaryn basqa barlyq saýda nysandarynda ornalastyrý múmkindigin qarastyrady. Osy maqsatta ishki saýda sýbektilerine otandyq azyq-túlik taýarlary úshin «Qazaqstanda jasalǵan» degen arnaiy belgisi bar kem degende 30 paiyz sórelik keńistik nemese saýda alańdaryn usyný mindetteledi.
«Úshinshi, baǵany turaqtandyrýdyń taǵy bir sharasy – áleýmettik mańyzy bar azyq-túlik taýarlaryna saýda ústemesin keminde 15 paiyz shekteý. Munan basqa saýda jelileri osy taýarlardy jetkizýshilerden syiaqy óndirip ala almaidy. Al qalǵan basqa azyq-túlik túrleri boiynsha 5 paiyzdan kóp emes mólsherde belgilei alady», - dedi ol.
Azamat Asqarulynyń aitýynsha, qazirgi kezde ministrlik tutynýshy quqyqtaryn qorǵaý týraly zań jobasyn ázirleýde. Onda ákimdikter jáne tutynýshylardy qorǵaý departamentteriniń ókilderi saýda erejelerin buzǵan ishki saýda sýbektileriniń jaýapkershiligin qarastyrady.
«Sonymen qatar ákimdikter saýda jelileri úshin áleýmettik mańyzy bar azyq-túlik taýarlaryn tirkelgen baǵa boiynsha satýdyń qarsy mindettemelerin belgilei otyryp, jeńildikti qaryz berýge múmkindikteri bar. Bul tetik ózin ótken jyly jetkilikti túrde dáleldedi. Ótken jyldan Nur-Sultan jáne Almaty qalalarynda osyndai oń tájiribe bar. Sonyń nátijesinde baǵany naryqtyq baǵadan tómen deńgeide tejeý qamtamasyz etildi», - dedi vitse-ministr.
Sondai-aq, ol Qazaqstannyń 5 óńirinde taýarlardy kóterme taratý ortalyqtary salynǵanyn aitty.
«Baǵany qajetti deńgeide ustap turý úshin otandyq óndiristi qalypqa keltirýimiz qajet. Búgingi kúni Qazaqstanda tutynylatyn qus eti men qanttyń 50 paiyzyn import quraidy. Sonymen qatar respýblikada kókónis ónimderiniń óndirisi jetkiliksiz ekendigin naqty aitýǵa bolady. Osyǵan bailanysty biz úshin taýarlardy durys saqtaý júiesi men óńirlerge bólýdi damytýdyń mańyzy zor. Bul úshin ministrlik saýda bólý júiesin jasaidy. Ol óndirýshilerdi, taýar-logistika kompaniialaryn, reiterlerdi, sondai-aq bazarlar men úi janyndaǵy dúkenderdi biriktiretin bolady», - dedi vitse-ministr vedomstvonyń Memleket basshysynyń taiaýdaǵy Joldaýynyń negizgi baǵyttaryn túsindirýge arnalǵan alqa otyrysynda.
Bul úshin onyń aitýynsha, Saýda jáne integratsiia ministrligi elimizdiń bes óńirinde, atap aitqanda, Jambyl, Batys Qazaqstan, Pavlodar, Shyǵys Qazaqstan jáne Qaraǵandy oblystarynda kóterme taratý ortalyqtaryn salady. Sondai-aq úsh óńirde taratý ortalyqtaryn salý josparlanǵan.
«Osyndai ortalyqtardy salý biz úshin tiisti saqtaý oryndarynyń azdyǵyn tolyqtyratyn kóptegen tiimsiz deldaldardy boldyrmaityn, taýarlardy óńirlerge qajettiligi boiynsha bóletin infraqurylymdyq keshen jasaidy», - dedi Azamat Asqaruly.
