QR Ulttyq bank tóraǵasy Erbolat Dosaev Qytaidaǵy koronavirýstyq indet álemdik ekonomikaǵa qalai áser etýi múmkindigine qatysty pikirimen bólisti, dep habarlaidy "Ult aqparat".
«Daǵdarysqa qarsy túrli josparlar jasaldy. Bizde aldyńǵy jyldarǵa jospar qurý boiynsha tájirbiemiz mol. Ótken jyldyń sońynda Úkimetpen birge qazirgi jaǵdaidy eskere otyryp, baǵdarlamalardy jańarttyq. Atap aitar bolsaq, munai baǵasynyń tómendeýi, saýda kedergilerin eskerý stsenariii boiynsha Úkimet pen Ulttyq bankte jospar bar», - dedi búgin Almatyda ótken brifingte Erbolat Dosaev.
Onyń aitýynsha, búginde álem ekige bólindi: biri – túbegeili, koronavirýstyq indet jahandyq ekonomikalyq quldyraýdyń qozdyrǵyshy bolady dep sanasa, ekinshi tarap Qytai úkimeti qysqa merzimde juqpaly aýrýdy jeńedi degen oida.
«Búkil álemdi lokalizatsiia qyzyqtyrady. Bul másele tek qytailyq problema emes jáne ony bári jaqsy túsinedi. Sondyqtan, meniń oiymsha, álemdik qaýymdastyq Qytai ekonomikasynyń damý turaqtylyǵyna múddeli. Búgingi tańda bizge qajetti sheshimder qabyldaý úshin ulttyq ekonomikalyq múddelerdi qorǵaý aiasynda oqiǵalar men máselelerge muqiiat baqylaý júrgizý qajet. Menińshe, koronavirýs álemdik retsessiiany iske qosatyn mańyzdy trigger emes. Qazirgi josparlarmen salystyrǵanda Slowdown bolýy múmkin, biraq bir ai ǵana ótti», - dedi Ulttyq bank basshysy.
