Qazaqstannyń Saýd Arabiiasyndaǵy Elshiligi Korol Feisal atyndaǵy Islamdyq zertteý ortalyǵymen birlesip, ál-Farabi atyndaǵy Qazaq ulttyq ýniversitetiniń qoldaýymen «Ábý Nasr ál-Farabidiń adamzat órkenietiniń damýyna qosqan úlesi» taqyrybynda halyqaralyq konferentsiia ótkizdi, dep habarlaidy QR SIM baspasóz qyzmeti.
Is-shara jumysyna Korol Feisal atyndaǵy Islamdyq zertteýler ortalyǵynyń basqarma tóraǵasy hanzada Týrki ál-Feisal ál Saýd, Islam yntymaqtastyǵy uiymy Bas hatshysynyń ǵylym jáne tehnologiia máseleleri jónindegi orynbasary Asqar Mýsinov, QazUÝ rektory Ǵalymqaiyr Mutanov, iraktyq jazýshy Rashid ál-Haiýn, Qazaqstan Ulttyq Ǵylym akademiiasynyń akademigi, professor Ábsattar qajy Derbisáli, birqatar saýdtyq filosoftar men ǵalymdar qatysyp, baiandamalar jasady.
Konferentsiia ashylýynda sóz sóilegen Elshi Berik Aryn kúlli musylman jurtynyń maqtanyshy, Ábý Nasyr ál-Farabidiń murasyn dáripteý jáne álemge pash etý maqsatynda Qazaqstanda jáne shet elderde ótip jatqan keń aýqymdy mereitoilyq jáne ǵylymi-praktikalyq sharalar týraly aita otyryp, olardyń, Memleket basshysy atap ótkendei, rýhani jańǵyrýda jáne jastardyń qundylyqtaryn qalyptastyrýda erekshe mańyzǵa ie ekenin aitty.
Sonymen qatar, diplomat ǵalym babamyzdyń mirasy týraly Tuńǵysh Prezident – Elbasy Nursultan Nazarbaev «Uly oishyl ál-Farabi esimi elimizdiń imidjin álemdik deńgeige kóterýge yqpal etetin asa qundy rámizdik kapital» dep atap ótkenin jetkizdi.
Óz kezeginde hanzada Týrki ál-Feisal ál-Farabidiń álemdik deńgeidegi kemeńger tulǵa ekendigin jáne onyń eńbekteri adamzat órkenietiniń damýyna orasan zor úles qosqanyn atai otyryp, ony islamdyq filosofiianyń negizin qalaýshylardyń biri jáne jahandyq bilim men ǵylymdy janjaqty baiytýǵa oń serpin bergen ǵulama ustaz dedi.
A. Mýsinov osy mereitoiǵa orai IYU sheńberinde atqarylyp jatqan sharalar, sonyń ishinde ú.j. 27-28 qarashada Niger Respýblikasynyń astanasy Niameide ótken Uiymǵa múshe memleketter Syrtqy ister ministrleri keńesiniń 47-shi sessiiasy barysynda qazaq tarapynyń usynysymen ál-Farabidiń 1150 jyldyǵyn uiym sheńberinde merekeleýge qatysty bastamalary qoldaý taýyp, arnaiy qarar qabyldanǵandyǵyn habarlady.
Sóz alǵan basqa qatysýshylar ál-Farabidiń ómir joly men ǵylymi eńbekterine qatysty ózderi júrgizgen izdenisteri týraly jan-jaqty baiandady. Osy rette Korol Feisal atyndaǵy ortalyqtyń sirek kitaptar bóliminiń basshysy Omar Tamalat ortalyq qorynda ál-Farabidiń birneshe eńbeginiń qoljazbalary men 90-ǵa jýyq kóshirmeleriniń saqtalǵandyǵyn, habarlap, olardy qazaqstandyq ǵalymdar óz izdenisterinde paidalanýyna bolatynyn málimdedi.
