Aqtóbe qalalyq soty terrorizmdi nasihattady degen aiyp taǵylǵan Asylbek Nysanovqa qatysty úkim shyǵardy. Ol Qylmystyq kodekstiń 256-babynyń 2-bóligi («Terrorizmdi nasihattaý nemese terrorizm aktisin jasaýǵa jariia túrde shaqyrý») boiynsha kináli dep tanylyp, 8 jylǵa bas bostandyǵynan aiyryldy, dep habarlaidy ult.kz.
Is materialdaryna sáikes, Asylbek Nysanov Saýd Arabiiasyna qonys aýdarǵannan keiin birneshe adamǵa terrorizmdi nasihattaityn materialdardy jibergen. Sot barysynda ol kinásin tolyq moiyndap, áleýmettik jelide tek daiyn mátinderdi bóliskenin málimdedi. Sondai-aq protsestik kelisim jasaý týraly ótinishhat bergen.
Alaida prokýratýra bul ótinishti qoldamaǵandyqtan, sot ony qanaǵattandyrmady.
Sot úkimine sáikes, Nysanov 8 jyl merzimge bas bostandyǵynan aiyrylyp, jazasyn qylmystyq-atqarý júiesiniń qaýipsizdigi ortasha mekemesinde óteidi.
Eske salaiyq, sottalýshy biyl Saýd Arabiiasynan Qazaqstanǵa ekstraditsiialanǵan bolatyn. Al oǵan qatysty qylmystyq is shamamen jeti jyl buryn qozǵalǵan.
