Elimizde saýalnamaǵa qatysqan 15-19 jas aralyǵyndaǵy qyzdardyń 17%-y buryn júkti bolǵandaryn aitsa, onyń ishinde 40 paiyzy jasandy túsik jasatqan. Bul týraly Nur-Sultan qalasynda ótken «Qazaqstan Respýblikasynda balalar men jastar arasynda jynystyq aǵartýdy damytý máselesin talqylaý. Búgingi shyndyǵy jáne keleshegi» atty dóńgelek ústelde aityldy, dep habarlaidy QazAqparat.
«2018 jyly Birikken Ulttar Uiymynyń Qazaqstandaǵy Halyqtyń qonystaný salasyndaǵy qory jasóspirimderdiń reprodýktivti densaýlyǵyna qatysty áleýmettik zertteý jumysyn júrgizgen. Saýalnamaǵa Qazaqstandaǵy 15-19 jas aralyǵyndaǵy 4 myńnan astam jasóspirim qatysqan. Saýalnama qorytyndysy boiynsha, jasóspirimderdiń úshten bir bóligi jynystyq qatynas turǵysynan belsendi ekeni anyqtalǵan. Osy belsendi toptyń 21%-y kámelettik jasqa tolmai jatyp jynystyq qatynasqa túskeni anyqtaldy», - deidi BUU-nyń Qazaqstandaǵy Halyqtyń qonystaný salasyndaǵy qorynyń qoǵammen qarym-qatynas boiynsha qyzmetkeri Dina Teltaeva.
Onyń aitýynsha, saýalnamaǵa qatysqan qyzdardyń 17 paiyzy buryn júkti bolǵandaryn aitqan.
«Saýalnamaǵa qatysqan qyzdardyń 17%-y buryn júkti bolǵandaryn aitsa, onyń ishinde 40 paiyzy jasandy túsik jasatqan. 43%-ǵa jýyq jasóspirim birneshe adammen jynystyq qatynasta bolǵanyn aitqan. Jalpy alǵanda, elimizdiń turǵyndary jynystyq qatynasqa on alty jarym jastan bastap túse bastaidy», - deidi ol.
Sondai-aq, maman jasóspirimderdiń reprodýktivti densaýlyǵyn jaqsartý úshin úsh nárse qajet ekenin aitty.
«Birinshiden, mektep baǵdarlamasyna jynystyq saýat týraly pán engizý kerek. Ekinshiden, jasóspirimderge óz densaýlyǵyn qorǵaý maqsatynda emhanaǵa baryp, keńes alýǵa bolatyn meditsinalyq qyzmet túrin engizý kerek. Jynystyq turǵyda belsendi jastarǵa qorǵanatyn zattardyń qoljetimdi bolýyn qamtamasyz etý kerek. Jynystyq qatynasqa túsetin bozbala men boijetkende qorǵana alý quqyǵy bolýy kerek. Olai etpegen jaǵdaida jasóspirimderge jynystyq jolmen ártúrli aýrýlar juqtyryp alý qaýpi týady», - deidi ol.
