Azamattardyń 72%-y sailaýda daýys berýge daiyn – Eýraziialyq integratsiia institýtynyń saýalnamasy, dep habarlaidy ult.kz.
Sailaý azamattardyń el isine aralasýy men saiasi belsendiliginiń mańyzdy kórsetkishi sanalady.
Eýraziialyq integratsiia institýty 2026 jyldyń 3-13 shildesi aralyǵynda Qazaqstannyń 17 oblysy men Astana, Almaty jáne Shymkent qalalarynda azamattar arasynda betpe-bet (face-to-face) saýalnama júrgizdi. Jalpy irikteý aýqymy 1640 respondentti qurady.
Saýalnama qazaqstandyqtardyń aldaǵy sailaý protsesine degen ynta-yqylasy joǵary ekenin kórsetti.
Respondentterge aldaǵy jeksenbide Quryltai sailaýy ótken jaǵdaida daýys berýge baratyn-barmaityny jaily suraq qoiyldy.
«Eger sailaý aldaǵy jeksenbide ótse, siz daýys berýdi josparlap otyrsyz ba?» degen suraqqa saýalnamaǵa qatysýshylardyń 72,1%-y oń jaýap berdi, iaǵni, sailaý ýchaskelerine barýǵa daiyn ekenin bildirdi. Respondentterdiń 14,2%-y senimdi emes ekenin bildirip, daýys bermeitinin aitty, al 13,7%-y naqty jaýap bere almady.
Respondentterge qazirgi ýaqytta qai partiiaǵa daýys beretinderi jaily «Eger sailaý aldaǵy jeksenbide ótse, siz qai partiiaǵa daýys berer edińiz?» degen suraq qoiyldy.
Partiialar reitinginde «Ádilet» partiiasy kósh bastap tur, búginde oǵan respondentterdiń 61,7%-y daýys berýge daiyn.
Ekinshi orynda – «Aýyl» partiiasy, oǵan respondentterdiń 5,1%-y daýys beretinin aitqan.
«Respublica» partiiasy men «Aq jol» partiiasynyń reitingteri shamalas – sáikesinshe, 4,5% jáne 4,1%.
Sondai-aq, Qazaqstan Halyq partiiasy (3,6%) men Jalpyulttyq sotsial-demokratiialyq partiiasynyń (3,5%) reitingteri shamamen bir deńgeide.
«Baitaq» jasyldar partiiasyn respondentterdiń 0,7%-y qoldaidy.
Respondentterdiń 2,6%-y «barlyǵyna qarsy» dep daýys berýge nietti, al 14,2%-y áli sheshim qabyldaǵan joq.
Saýalnama qorytyndysy respondentterdiń kóńil-kúiine sailaý jariialanǵannan keiin baiqalǵan saiasi partiialardyń belsendiligi aitarlyqtai áser etkenin kórsetedi. Saýalnamanyń sońǵy kezeńi partiialardyń sailaýaldy baǵdarlamalary bekitilip, kandidattar tizimderi jariialanǵan sezderi ótip jatqan kezine tuspa-tus keldi.
Jalpy alǵanda, zertteý azamattardyń aldaǵy sailaýǵa degen yqylasy aitarlyqtai joǵary ekenin, sondai-aq partiialardyń sailaýǵa daiyndyq kezeńindegi belsendiligi sailaýshylardyń kózqarasyna qanshalyqty áser etetinin kórsetedi.
Irikteý tańdalǵan parametrler boiynsha (aimaq, turǵylyqty jeri (qala/aýyl), jynysy, jasy jáne etnosy) reprezentativti bolyp tabylady, olar 18 jastan asqan azamattardyń áleýmettik-demografiialyq quramynyń tiisti úlesterine jýyqtaidy (QR Strategiialyq josparlaý jáne reformalar agenttiginiń Ulttyq statistika biýrosynyń 2026 jylǵy sáýirdegi derekteri boiynsha). Irikteýdiń 95% senimdilik deńgeiindegi qatelik shegi ±1,18%-dan aspaidy.
Eýraziialyq integratsiia institýty bul derekterdi Ortalyq sailaý komissiiasynyń 2026 jylǵy 3 shildedegi №OSK-11-07/ZT-S-30 jazbasha habarlamasyna súiene otyryp jariialaidy
