Almatyda buǵan deiin Qairat Satybaldyulynyń aktivterimen bailanystyrylǵan DoubleTree by Hilton qonaqúi kesheni satylymǵa shyǵaryldy. Nysannyń bastapqy baǵasy — 12,76 milliard teńge, dep habarlaidy ult.kz.
Memlekettik múlik jáne jekeshelendirý departamenti usynǵan lot boiynsha aýktsion 25 qyrkúiekte ótedi. Saýda baǵany kóterý ádisimen júrgiziledi. Bir ǵana qatysýshy bolǵan jaǵdaida da nysandy satýǵa ruqsat etilgen.
Dosmuhamedov kóshesi, 115 mekenjaiynda ornalasqan qonaqúidiń jalpy aýdany 16 196,4 sharshy metr. Nysan 0,2581 gektar jer teliminde ornalasqan, alaida jer ýchaskesi jekeshelendirý nysanynyń quramyna kirmeidi.
Qonaqúi ǵimaraty 2023 jylǵy 18 qyrkúiekte Qairat Satybaldyulynan syiǵa tartý sharty arqyly memleket menshigine ótken. Alaida sol kezde nysandy «ABLI-Qurylys» JShS ielenip otyrǵan. Memlekettik múlik departamenti kompaniianyń ǵimaratty ielenýine zańdy negiz bolmaǵanyn málimdegen.
2024 jyly sot departamenttiń qonaqúidi bosatý týraly talabyn qanaǵattandyrdy.
Buǵan deiin Májilis depýtaty Ermurat Bapi qonaqúidi «kúshpen tartyp alý» áreketi júrip jatqanyn aityp, Bas prokýratýraǵa saýal joldaǵan. Ol nysannyń baǵasy tómendetilýi múmkin ekenin de málimdegen. Depýtattyń aitýynsha, naryqtyq quny shamamen 12 milliard teńge bolatyn qonaqúi 4,5 milliard teńgege baǵalanǵan.
Al Antikor buǵan deiin qonaqúidiń 6,49 milliard teńgege baǵalanǵanyn habarlaǵan.
Qazir memleket nysandy 12,76 milliard teńgege bastapqy baǵamen satylymǵa shyǵaryp otyr.
Qonaqúi Qairat Satybaldyuly memleketke qaitarǵan, jalpy quny 732,8 milliard teńgeden asatyn aktivterdiń qatarynda bolǵan.
