Foto: primeminister.kz
Túrkistan oblysynyń ákimi Darhan Satybaldy "Samuryq-Qazyna" qory salyp bergen Qoja Ahmet Iassaýi mýzeiiniń ne sebepti ashylmai jatqanyn aitty, - dep habarlaidy Sputnik Qazaqstan.
Búgin ortalyq kommýnikatsiialar qyzmetinde ótken brifingte jýrnalister úsh jyl buryn salynǵan nysan týraly saýal qoidy.
"2020 jyly Qoja Ahmet Iassaýi mýzeii salynǵan bolatyn. Quny – 3,3 mlrd teńge. Biraq ony áli kúnge deiin paidalanýǵa bergen joq. Qurylys kezinde kóptegen kemshilik boldy deidi. Naqty sebebi qandai? Mýzei nege ashylmai jatyr? Al, eń bastysy, aqsha qaida ketti?", - dep surady tilshiler.
Oblys basshysy mýzeidiń úsh jyl buryn tapsyrylǵanyn rastady. Ony "Samuryq-Qazyna" qory salyp bergen. Odan keiin sol nysandy Túrkistan ákimdigine aqysyz rásimdegen.
"Biraq nysandy qabyldaǵanda ishki árleý jumystary bolmaǵan. Osyǵan bailanysty qala ákimdigi mýzeidiń ishin bezendirýge qosymsha qarajat qarastyrǵan edi. Alaida nysan áli paidalanýǵa berilmedi. Men ózim baryp kórdim... Biraq aldymen bul máseleniń anyq-qanyǵyna kóz jetkizgim kelip tur", - dedi Satybaldy.
Osy oraida ákim tekseristiń qalai júrgiziletinin túsindirdi. Onyń aitýynsha, aldymen barlyq material quqyq qorǵaý organdaryna jiberiledi. Olar ishki aýdit qyzmetin tartyp, nysanǵa jumsalǵan qarjynyń qanshalyqty negizdi bolǵanyn tekseredi.
"Negizi kelisimniń merzimi 2023 jyldyń aiaǵyna deiin belgilengen. Biraq barlyq mán-jaidy anyqtamaiynsha men ol nysandy qabyldamaimyn", - dedi oblys basshysy.
