Qazaqstanda tutynýshylar shaǵymyn qaraýdyń úsh deńgeili mehanizmi engiziledi. Bul týraly QR Parlamenti Senatynyń jalpy otyrysynda tutynýshylar quqyǵyn qorǵaý máseleleri kózdelgen zań jobasyn tanystyrǵan QR Saýda jáne integratsiia ministri Baqyt Sultanov aitty, dep habarlaidy QazAqparat.
«Zań jobasy 7 zańnamalyq aktige, onyń ishinde 3 kodeks pen 4 zańǵa 200-ge jýyq túzetýlerdi engizýdi kózdeidi. Olardyń negizgi baǵyttary: birinshiden, halyqqa tutynýshylar quqyǵyn qorǵaýdyń tutas jáne tiimdi júiesin qalyptastyrý; ekinshiden, ýákiletti organnyń, onyń ishinde tiisti salalarda tutynýshylar quqyǵyn qorǵaýdy júzege asyratyn memlekettik organdardyń qyzmetin úilestirý jónindegi rólin kúsheitý; úshinshiden, úkimettik emes uiymdardy institýtsionaldyq kúsheitýge jáne tutynýshylardyń quqyqtaryn qorǵaýdyń kóp deńgeili júiesine belsendi tartýǵa, sondai-aq olardy qoldaý», - dedi «Qazaqstan Respýblikasynyń keibir zańnamalyq aktilerine tutynýshylar quqyǵyn qorǵaý máseleleri boiynsha ózgerister men tolyqtyrýlar engizý týraly» QR Zańynyń jobasyn tanystyrǵan ministr.
Onyń atap ótýinshe, zań jobasymen shaǵymdardy qaraýdyń úsh deńgeili mehanizmi engiziledi. I deńgeide satýshynyń shaǵymdy óz erkimen nemese daýlardy sotqa deiingi retteý sýbektileri arqyly qaraý kózdeledi. Atalǵan mehanizmdi zańnamalyq bekitýdiń negizgi maqsaty - buzylǵan quqyqtardy qalpyna keltirý, moraldyq jáne materialdyq zalaldy «qazir jáne osynda» printsipi boiynsha qysqa ýaqytta az shyǵynmen óteý. Bul rette tutynýshynyń qalaýymen daý sotqa deiin retteý aiasynda sheshiledi.
«II deńgeide shaǵymdar ýákiletti organǵa jiberiledi. Satýshylar buzýshylyqtardy óz erkimen joiýdan bas tartqan jaǵdaida ákimshilik jaýapkershilikke tartylady. III deńgei – sotqa shaǵym berý. Sotqa deiingi retteý institýtynyń engizilgenin eskere otyryp, sottar tutynýshy men satýshy arasynda ózara tiimdi kelisimi joq daýlardy qaraidy. Úsh deńgeili mehanizmdi ret-retimen qoldaný sot organdaryna túsetin júktemeni tómendetýge alyp keledi dep oilaimyz», - dedi Baqyt Sultanov.
