Tanymal akter Almat Saqatov shetelde eńbek etip júrgen qazaqstandyqtarǵa qatysty pikirin bildirdi, dep habarlaidy ult.kz.
Óner iesiniń sózinshe, shetelge tabys tabý maqsatynda ketken azamattardyń basqa eldegi ómirdi asyra maqtap, Qazaqstanda júrgenderdi kóshýge úgitteýi durys emes.
Akter ózine Ońtústik Koreiada jumys istep júrgen qazaqstandyqtardyń jii jazatynyn aitty. Olar eldegi jaǵdaidy maqtap, azyq-túliktiń arzandyǵyn, kóshelerdiń jailylyǵyn aityp, ony da Koreiaǵa barýǵa shaqyratyn kórinedi.
"Shetelde jumys istep júrgen jigitter, sizder erikkennen ketken joqsyzdar ǵoi. Ómir súrý, aqsha tabý úshin jantalasyp bardyńyzdar. Endi sol jaqqa barǵan soń, Otanynda tynysh júrgen azamattarǵa "munda kúshti, kelińder" dep kóp aita bermeńder", – dedi Almat Saqatov.
Ol mundai áreketti tikelei satqyndyq dep atamaitynyn da naqtylady. Degenmen akterdiń pikirinshe, sheteldegi ómirdi tym ásirelep kórsetý elde júrgen jáne Otanyn jaqsy kóretin azamattardyń kóńiline keri áser etýi múmkin.
Saqatov adamdardyń shetelge kóbine jaqsy ómir men joǵary tabys izdep baratynyn túsinetinin jetkizdi. Onyń aitýynsha, ár adam qaida jumys isteitinin ózi sheshedi, alaida elden ketýge májbúr bolǵan sebepterdi de esten shyǵarmaǵan jón.
"Jumys istegisi kele me – barady. Qysylyp, qinalǵannan keiin baryp jatyr ǵoi. Áitpese bul jaqta bári jaqsy bolyp tursa, eshkim ketpeidi. Ol jaǵyn da oilaný kerek", – dedi akter.
Almat Saqatov kim?
Almat Saqatov – qazaqstandyq teatr jáne kino akteri, satirik ári ázil-syqaq janrynda tanylǵan óner iesi. Ol Shyǵys Qazaqstandaǵy burynǵy Marqakól aýdanynyń týmasy.
Almat Saqatov ónerge jaqyn otbasynda ósken. Onyń ákesi – rejisser, satirik Marat Saqatov. Marat Saqatov "Tamasha" teatr-komediiasynyń negizin qalaýshylardyń biri bolǵan. Anasy Aitjamal da teatr sahnasynda óner kórsetken.
Almat Saqatov bala kezinen sahnaǵa shyǵyp, túrli qoiylymdarǵa qatysqan. Keiin ákesiniń jolyn jalǵastyryp, kásibi óner salasyna bet burdy. Kópshilik ony ásirese "Baýyrjan shoý" ázil-syqaq teatry arqyly jaqsy tanydy. Bul ujymda ol túrli obrazdardy somdap, ázil janryndaǵy akter retinde tanymal boldy.
Saqatov televiziia salasynda da eńbek etken. Ol bir kezeńde "Qazaqstan" Ulttyq telearnasyndaǵy "Tańsholpan" baǵdarlamasyn júrgizdi. Akterdiń ózi tikelei efirde baǵdarlama júrgizýdi shyǵarmashylyq jolyndaǵy eń qiyn jumystardyń biri dep ataǵan.
Keiin Almat Saqatov kino men telehikaialarǵa belsendi túse bastady. Onyń shyǵarmashylyǵynda komediialyq róldermen qatar dramalyq keiipkerler de bar. Akter "Kózaiym" telehikaiasynda da ról somdaǵan. Keiingi jyldary "Raýza", "Patsanskie istorii", "ToiHana", "Afgan", "Restart" sekildi birqatar kino jáne telejobalarǵa qatysty.
Saqatov akterlikpen qatar jas ónerpazdardy daiyndaýmen de ainalysqan. Almatyda óziniń "Ázil stýdiiasyn" ashyp, ondaǵy akterlerdi birneshe jyl boiy daiyndaǵanyn aitqan. Sondai-aq ol uzaq jyldar boiy asabalyq qyzmet atqaryp, toi júrgizgen.
Almat Saqatov otbasyly, jubaiymen birneshe onjyldyq boiy birge turyp keledi. Búginde ol balalary men nemereleri bar ekenin suhbattarynda aityp júr. Óner iesi shyǵarmashylyqtan bólek, qoǵamdaǵy túrli máselelerge qatysty pikirin ashyq bildirýimen de kópshilikke tanys.
